سعد فاروق
دفتر خارجہ نے بھارتی میڈیا کی جانب سے پاکستان پر حملوں، پاکستانی جنگی طیاروں کی تباہی اور پائلٹ کی گرفتاری سے متعلق دعوؤں کو سختی سے مسترد کرتے ہوئے انہیں جھوٹ، سیاسی مفاد پر مبنی پروپیگنڈا اور خطے میں عدم استحکام پھیلانے کی سازش قرار دیا ہے۔
باغی ٹی وی کے مطابق دفتر خارجہ کے ترجمان نے ایک بیان میں کہا کہ بھارتی میڈیا اور حکام کی جانب سے پٹھان کوٹ، جیسلمیر اور سری نگر پر مبینہ پاکستانی حملوں اور ایف-16 یا جے ایف-17 طیاروں کی تباہی کے دعوے سراسر جھوٹ پر مبنی اور قابل مذمت ہیں۔ ان میں کسی قسم کی تحقیق یا ثبوت شامل نہیں اور یہ پاکستان کے خلاف نفرت انگیز مہم کا حصہ ہیں۔
ترجمان کا کہنا تھا کہ بھارت ایک منصوبہ بندی کے تحت سیاسی اور عسکری مقاصد کے لیے غلط معلومات کو استعمال کر رہا ہے تاکہ جھوٹے الزامات کے ذریعے پاکستان کے خلاف جارحیت کا جواز پیدا کیا جا سکے۔ اس قسم کے اقدامات نہ صرف علاقائی امن و سلامتی کے لیے خطرہ ہیں بلکہ جنوبی ایشیا میں پہلے سے کشیدہ صورتحال کو مزید بگاڑنے کا باعث بن سکتے ہیں۔
دفتر خارجہ نے عالمی برادری سے مطالبہ کیا کہ بھارت کی اس خطرناک مہم جوئی کا سنجیدگی سے نوٹس لے اور اسے تحمل اور بین الاقوامی ذمہ داری کا مظاہرہ کرنے کی تلقین کرے۔ ترجمان نے واضح کیا کہ پاکستان کسی بھی قسم کی اشتعال انگیزی، جھوٹے الزامات یا جارحیت کا بھرپور اور مؤثر جواب دینے کی مکمل صلاحیت رکھتا ہے۔
ترجمان دفتر خارجہ نے بھارتی میڈیا کے اس دعوے کو بھی سختی سے مسترد کیا کہ پاکستان کا کوئی ایف-16 یا جے ایف-17 طیارہ نشانہ بنایا گیا یا کسی پاکستانی پائلٹ کو گرفتار کیا گیا ہے۔ ایسی تمام خبریں بے بنیاد، گمراہ کن اور بھارتی عوام کو دھوکہ دینے کی ایک ناکام کوشش ہیں۔ترجمان نے اپنے بیان کے اختتام پر کہا کہ پاکستان خطے میں امن کا خواہاں ہے، لیکن اپنے دفاع، خودمختاری اور علاقائی سالمیت کے تحفظ کے لیے مکمل طور پر تیار ہے۔ کسی بھی قسم کی مہم جوئی یا جارحیت کا فوری، بھرپور اور فیصلہ کن جواب دیا جائے گا۔
ائیر ڈیفنس سسٹم کی بڑی کامیابی، بھارت کا ایک اور ڈرون مار گرایا
پاک بھارت کشیدگی کے بعد اسلام آباد میں ہنگامی انتظامات
پاک بھارت کشیدگی کے بعد اسلام آباد میں ہنگامی انتظامات
بھارت کا بزدلانہ حملہ، فرانسیسی اخبار نے بھارتی فضائیہ کی نااہلی کا پول کھول دیا
