چیئرپرسن بینظیر انکم سپورٹ پروگرام (BISP) ڈاکٹر محمد امجد ثاقب نے آج اسلام آباد میں بینظیر ون ونڈو سینٹر کا دورہ کیا۔ اس دورے میں ان کے ہمراہ ڈائریکٹر جنرل قومی سماجی و معاشی رجسٹری (NSER) جناب نوید اکبر بھی تھے جبکہ بینظیر ون ونڈو سینٹر دورے کا مقصد وہاں آپریشنز کا معائنہ کرنا اور مستحق خواتین سے بات چیت کرنا تھا۔ ڈاکٹر امجد ثاقب کو عملے نے ون ونڈو سنٹر کے آپریشنز کے بارے میں ایک جامع بریفنگ دی۔
جبکہ بینظیر ون ونڈو سینٹر ایک منفرد اقدام ہے جس کے تحت بی آئی ایس پی، نادرا، پی پی اے ایف، پاکستان بیت المال، اخوت اور ایچ بی ایل سمیت متعدد اداروں کے نمائندگان ایک چھت کے نیچے بی آئی ایس پی مستحقین کو انکے مسائل کے حل کیلئے رہنمائی فراہم کرتے ہیں۔ ون ونڈو سینٹر میں، مستحقین بی آئی ایس پی میں رجسٹریشن، اہلیت کی تشخیص، بینظیر تعلیمی وظائف پروگرام میں اپنے بچوں کے اندراج، اور بینظیر نشوونما پروگرام کے فوائد حاصل کر سکتے ہیں۔ یہ مرکز روزانہ تقریباً 200 سے 500 خواتین کو خدمات فراہم کرتا ہے۔
ڈاکٹر امجد ثاقب نے بینظیر کفالت پروگرام کے تحت رجسٹریشن کے لیے وہاں موجود مستحقین سے بات چیت بھی کی۔ انہوں نے استفادہ کنندگان کو درپیش چیلنجوں اور مسائل کو سمجھنے میں گہری دلچسپی کا اظہار کیا اور دریافت کیا کہ BISP کی مالی معاونت نے ان کی زندگیوں اور ان کے خاندانوں پر کس طرح مثبت اثر ڈالا ہے، ڈاکٹر امجد ثاقب نے مرکز میں موجود سہولیات اور انتظامات جیسے صفائی ستھرائی، پینے کے پانی تک رسائی اور اپنی باری کے انتظار میں مستحقین کے لیے مناسب سایہ دار جگہوں کا بھی معائنہ کیا۔ انہوں نے مستحق خواتین کے ساتھ احترام اور شائستگی کے ساتھ پیش آنے کے ساتھ ساتھ ان کے مسائل و شکایات کے حل کو یقینی بنانے پر زور دیا۔ مزید برآں، انہوں نے عملے کو نصیحت کی کہ وہ صفائی ستھرائی، درخت لگانے اور پانی کے استعمال کے حوالے سے مستحق خواتین میں شعور اجاگر کریں۔
مزید یہ بھی پڑھیں؛
روپےکے مقابلے میں ڈالر کی قدر میں کمی
شعیب ملک اور رمیز راجہ کا شاہین شاہ کے حوالے سے تشویش کا اظہار
علاوہ ازیں مانیٹرنگ کی اہمیت پر روشنی ڈالتے ہوئے ڈاکٹر امجد ثاقب نے مستحقین تک خدمات کی فراہمی میں مسلسل بہتری کی ضرورت پر زور دیا۔ انہوں نے مرکز میں اضافی بینک ایجنٹس کی موجودگی کو یقینی بنانے پر بھی زور دیا تاکہ مستحقین کو رقوم کی بغیر کسی رکاوٹ کے تقسیم کی سہولت فراہم کی جاسکے۔ انہوں نے بینظیر ون ونڈو سینٹر جیسے مراکز کو ملک بھر کے دیگر صوبوں تک پھیلانے کے لیے اپنے عزم کا اظہار کیا۔