بالی ووڈ کے معروف اداکار نواز الدین صدیقی کا کہنا ہے کہ بالی ووڈ کے تمام سپراسٹار حقیقی اداکاری کی بجائےجعلی اداکاری کرتے ہیں۔
باغی ٹی وی : بھارتی میڈیا رپورٹ کے مطابق نواز الدین صدیقی نے بالی ووڈ کے اداکاروں پر تنقید کرتے ہوئے کہا کہ بہترین اداکاری کی وجہ سے کہلائے جانے والے بالی ووڈ کے سپر اسٹار حقیقی اداکاری کے بجائے بناوٹی اداکاری کرتے ہیں۔
نواز الدین صدیقی نے اداکاری میں شوق رکھنے والے لوگوں کو مخاطب کرتے ہوئے کہا کہ میں اپنے تجربے سے یہ کہوں گا کہ اگر آپ لوگوں کو اداکاری کرنی ہے تو اس کے لئے ضروری ہے کہ آپ اپنے اندر چھپے حقیقی اداکار کو سامنے لائیں، بجائے اس کے کہ آپ کسی اور سے متاثر ہو کر اس کی طرح اداکاری کریں۔
انہوں نے کہا کہ سپراسٹار جعلی اداکاری کرتے ہیں تو ان کی پیروی نہ کریں، نئے اداکار خود سے کچھ منفرد کرکے دکھائیں کیوںکہ لوگ آپ کی اداکاری دیکھنا چاہتے ہیں اگر آپ کسی سپراسٹار کی طرح ہی اداکاری کریں گے تو پھر لوگ آپ کو کیوں دیکھیں گے لیکن اگر آپ اداکاری کے فن کو قدرتی صلاحیتوں کے ساتھ دکھائیں گے تو لوگوں کی تمام تر توجہ آپ پر ہی ہوگی اور ایسے اداکاروں کو لوگ دیکھنا بھی پسند کرتے ہیں۔
واضح رہے کہ اس سے قبل اپنے ایک انٹر ویو میں نواز الدین صدیقی کا کہنا تھا کہ ابتداء سے بالی ووڈ میں یہ تاثر رہا ہے کہ سپر ہٹ فلم کرنے والے کو اچھا اداکار سمجھا جاتا ہے صرف اسے ہی بہتر اداکار سمجھا جاتا ہے جو 100 کرو کا بزنس کرے لیکن مجھے ایسا لگتا ہے کہ مجھے بھی کچھ اس طرح کی فلموں میں کام شروع کردینا چاہیے جوکہ کامیڈی کے تڑکے سے بھرپور ہوں لیکن حقیقت تو یہ ہے کہ میں ہمیشہ ویسی ہی فلم کرتا ہوں جس پر مجھے پورا یقین اور اعتماد ہوتا ہے لیکن اس طرح کی فلمیں بہت ہی کم دیکھی جاتی ہیں۔
