لندن :کرونا وائرس نے سب فرق مٹا دیئے عام شخص سے لیکربادشاہوں تک سب لپیٹ میں ،اب برطانوی نائب وزیرصحت زد میں آگئیں ، ذرائع کےمطابق برطانوی نائب وزیر صحت 62 سالہ نیڈن ڈورس نے تصدیق کی ہے کہ وہ بھی ’کورونا وائرس‘ میں مبتلا ہوگئی ہیں جب کہ ان کی والدہ میں بھی مذکورہ وائرس کی علامات ظاہر ہو رہی ہیں۔
برطانیہ میں 11 مارچ کی صبح تک 382 افراد میں کورونا کی تصدیق ہو چکی تھی جن میں سے 6 افراد ہلاک ہوچکے تھے۔برطانوی حکومت کے مطابق 11 مارچ تک ’کورونا وائرس‘ میں مبتلا ہونے والے 382 افراد میں سے 18 مریض صحت یاب ہو چکے تھے۔
نائب وزیر صحت 62 سالہ نیڈن ڈورس نے 11 مارچ کو اپنی ایک ٹوئٹ میں تصدیق کی کہ وہ ’کورونا وائرس‘ میں مبتلا ہوچکی ہیں اور یہ انتہائی پریشانی کی بات ہے تاہم انہیں امید ہے کہ سب کچھ خیریت اور بہتری سے گزر جائے گا۔
نائب وزیر صحت نے اپنی ٹوئٹ میں اپنی 84 سالہ والدہ کی طبیعت کے حوالے سے بھی تشویش کا اظہار کیا اور بتایا کہ ان کی والدہ کو بھی کھانسی شروع ہوگئی ہے، جس وجہ سے اب ان کا بھی ٹیسٹ کیا جائے گا۔
Thanks for so many good wishes. It’s been pretty rubbish but I hope I’m over the worst of it now. More worried about my 84yo mum who is staying with me and began with the cough today. She is being tested tomorrow. Keep safe and keep washing those hands, everyone.
— Rt Hon Nadine Dorries (@NadineDorries) March 10, 2020
برطانوی اخبار ’دی گارجین‘ نے اپنی رپورٹ میں بتایا کہ نائب وزیر صحت اور پہلی رکن پارلیمنٹ میں ’کورونا وائرس‘ کی تصدیق کے بعد دیگر ارکان پارلیمنٹ اور سیاستدانوں میں بھی تشویش کی لہر دوڑ گئی ہے اور ممکنہ طور پر اب ان تمام سیاستدانوں اور ارکان پارلیمنٹ کے ٹیسٹ کیے جائیں گے جنہوں نے گزشتہ کچھ ایام کے دوران متاثرہ نائب وزیر صحت سے ملاقات کی۔
’کورونا وائرس‘ میں مبتلا ہونے والی نائب وزیر صحت نیڈن ڈورس نے 3 دن قبل برطانوی وزیر اعظم بورس جانسن، ان کی حاملہ گرل فرینڈ اور دیگر ارکان پارلیمنٹ سے بھی 10 ڈاؤننگ اسٹریٹ (وزیر اعظم ہاؤس) میں ہونے والی ایک تقریب میں ملاقات کی تھی۔
علاوہ ازیں نائب وزیر صحت پارلیمنٹ کے اجلاسوں میں بھی شریک ہوئیں اور وہاں انہوں نے متعدد ارکان سے ملاقاتیں کیں اور اب ان تمام ارکان، سیاستدانوں اور افراد کی فہرست مرتب کی جا رہی ہے، جنہوں نے نائب وزیر صحت سے ملاقات کی۔
برطانوی میڈیا کے مطابق خیال کیا جا رہا ہے کہ وہ تمام ارکان پارلیمنٹ، سیاستدان اور افراد کورونا کا ٹیسٹ کروائیں گے جنہوں نے حال ہی میں نائب وزیر صحت نیڈن ڈورس سے ملاقات کی، تاہم وزیر اعظم بورس جانسن کی میڈیا ٹیم کی جانب سے فوری طور پر یہ نہیں بتایا گیا کہ وزیر اعظم بھی ٹیسٹ کروائیں گے یا نہیں۔
