اسلام آباد: قطرمیں اہم ملاقات کے بعد برطانوی وزیر خارجہ ڈومینک راب آج پاکستان پہنچیں گے ،اطلاعات کے مطابق ترجمان دفترخارجہ عاصم افتخار نے کہا ہے کہ برطانوی وزیر خارجہ ڈومینک راب آج پاکستان پہنچیں گے۔
ترجمان دفتر خارجہ کے مطابق برطانوی وزیر خارجہ پاکستانی ہم منصب سے ملاقات کریں گے، ملاقات میں افغان صورتحال پر تبادلہ خیال کیا جائے گا، برطانوی وزیر خارجہ دو روز پاکستان میں قیام کریں گے۔
اس سے قبل برطانیہ کے سیکرٹری خارجہ ڈومینک راب نے کہا ہے کہ برطانیہ کی حکومت متوقع مستقبل میں طالبان کو تسلیم نہیں کرے گی۔
دوحہ میں پریس کانفرنس کرتے ہوئے برطانوی وزیر خارجہ نے کہا کہ برطانیہ کو اب ’اس نئی حقیقت سے ہم آہنگ ہونا ہو گا۔‘ طالبان پر ’معتدل اثرورسوخ ڈالنے کے لیے‘ ایک گروپ بنانے کی ضرورت ہے۔
ان کا کہنا تھا کہ بہت سے ممالک ایسے ہیں جو افغانستان کی صورتحال سے برا راست متاثر ہوئے ہیں جبکہ بہت سے ملک ایسے بھی ہیں جو انسانی خطرے اور حالت زار سے متاثر ہوں گے۔ ہم یقینی طور پر انھیں دیکھ رہے ہوں گے اور سب سے اہم بات کہ جو یقین دہانی انھوں نے کرائی ہے وہ اس کے بارے میں کیا کرتے ہیں۔
ادھر ذرائع نے دعویٰ کیا ہے کہ برطانوی وزیرخارجہ امر یکی پلان پرعمل کرتے ہوئے قطر پہنچے ہیں اوریہ بھی کہا جارہا ہےکہ اس دورے کا مقصد افغان طالبان کو قطرکے ذریعے سے اس بات پر قائل کرنا ہے کہ جتنے بھی باقی امریکی اوربرطانوی افغانستان میں پیچھے رہ گئے ہیں ان کو پہلے قطر لایا جائے اورپھربعد ازاں ان کے ملکوںکو بھیج دیا جائے
