کراچی: کنٹونمنٹ بورڈ انتخابات؛ پولنگ اسٹیشن کے اندر سے 2 جعلی ایجنٹس گرفتار،اطلاعات کے مطابق کنٹونمنٹ بورڈ انتخابات کے لئے پولنگ کے دوران الیکشن کمیشن کے عملے نے پولنگ اسٹیشن کے اندر سے 2 جعلی ایجنٹس پکڑ کرلیے۔
کراچی سے ذرائع کے مطابق کلفٹن کنٹونمنٹ بورڈ کے وارڈ نمبر 4 میں خواتین کے لیے قائم ایک پولنگ اسٹیشن سے 2 افراد کو حراست میں لیا گیا ہے، دونوں افراد جعلی پولنگ ایجنٹ تھے اور ان کا تعلق مختلف سیاسی جماعتوں سے بتایا جارہا ہے۔
ریٹرننگ آفیسر کلفٹن کنٹونمنٹ بورڈ سلیم حسن وٹو نے بتایا کہ دونوں پولنگ ایجنٹس جعلی تھے، وہ کسی تصدیقی دستاویزات کے بغیر خواتین کے پولنگ اسٹیشن میں موجود تھے، جعلی پولنگ ایجنٹس کو گرفتار کرکے پولیس کی تحویل میں دے دیا گیا ہے، اب ان کے خلاف قانون کے مطابق کارروائی ہوگی۔
واضح رہے کہ کلفٹن کنٹونمنٹ بورڈ میں صدر مملکت عارف علوی، گورنر سندھ عمران اسماعیل سمیت مختلف سیاسی و سماجی شخصیات، اراکین اسمبلی، کھیلوں اور شوبز کے میدان میں شہرت پانے والے کھلاڑیوں اور فنکاروں کے ووٹ بھی موجود ہیں۔
ادھر الیکشن کمیشن کی طرف سے جاری ہدایات کے مطابق شام 5 بجے پولنگ کا وقت ختم ہوجائے گا جس کےبعد گنتی کا عمل شروع ہوگا اورپھروقفے وقفے سے نتائج بھی جاری کیے جائیں گے
