’کریم‘ نے اپنی سپر ایپ میں کورونا ویکسینز کے حوالے سے نیا فیچرلانچ کردیا

آن لائن سفری سہولیات فراہم کرنے والی معروف کمپنی ’کریم‘ نے اپنی سپر ایپ میں کوویڈ 19 کے حوالے ایک نیا فیچر متعارف کروایا ہے-

باغی ٹی وی : ’کریم‘ کی جانب سے ‘گیڈ ویکسینیٹڈ’ کے نام سے سپر ایپ کے اس فیچر کے ذریعے صارفین آسانی سے قریبی ویکسینیشن سینٹر پر کال کرکے آسانی سے ٹریفک اور پارکنگ کے تمام مسائل کے بغیر رائیڈ بک کراسکتے ہیں۔

مزید برآں اس فیچر میں ویکسین کے لیے اہلیت، ملک بھر میں قائم کیے گئے تمام ویکسین سینٹرز کی لوکیشن اور ٹائمنگز بھی شامل ہیں۔

فیس بک پر کریم کی جانب سے شیئر کی گئی پوسٹ میں کہا گیا کہ ہم اس اہم وقت میں آپ کی مدد کے لیے پُرعزم ہیں۔

پوسٹ میں کہا گیا کہ کریم ایپ کے ہوم پیج پر موجود ہمارا نیا فیچر ‘گیٹ ویکسینیٹڈ’ حکومت کی جانب سے قائم کیے گئے تمام کویڈ-19 ویکسینیشن سینٹرز کی تفصیلات فراہم کرتا ہے اور آپ کو محفوط طریقے سے وہاں لے جاتا ہے۔

مزید کہا گیا کہ یہ نوٹ کرلیں کہ آپ اس وقت کریم کی رائیڈ بُک کرائیں کہ آپ میں کورونا وائرس کی علامات ظاہر نہ ہوئی ہوں اور گزشتہ 14 روز میں کورونا سے متاثرہ فرد سے رابطےمیں نہ رہے ہوں۔

پوسٹ میں کہا گیا کہ آپ کریم کی سخت حفاظتی پالیسیوں سے مستفید ہوں گے اور ویکسینیشن سینٹر کی پارکنگ میں ہجوم سے بچیں گے۔

واضح رہے کہ یکم فروری کو چین سے کورونا وائرس سے بچاؤ کی ویکسین کی 5 لاکھ خوراکوں پر مشتمل پہلی کھیپ پاکستان پہنچی تھی جس کے بعد 3 فروری سے کورونا کے خلاف صفِ اول میں کام کرنے والے ہیلتھ ورکرز کی ویکسینیشن کا آغاز ہوا تھا۔

ملک میں فرنٹ لائن ہیلتھ ورکرز کے بعد 60 سال اور اس سے زائد عمر کے افراد کو ویکسین لگانے کے لیے رجسٹریشن کا آغاز 15 فروری سے ہوا تھا جبکہ ویکسینیشن کا عمل 10 مارچ سے شروع ہوا تھا۔

بعد ازاں 26 مارچ کو وفاقی وزیر برائے منصوبہ بندی اسد عمر نے اعلان کیا تھا کہ ملک میں 50 سال سے زائد عمر کے افراد کے لیے کورونا کی ویکسینیشن کے لیے رجسٹریشن کا آغاز 30 مارچ سے ہوگا۔