چمن دھماکے میں جاں بحق افراد کی تعداد بڑھ گئی
باغی ٹی وی : چمن کےمرغی بازارمیں دھماکہ ،جاں بحق افرادکی تعداد7ہوگئی .دھماکہ موٹرسائیکل میں نصب بارودی مواد کے ذریعے کیا گیا، دھماکہ ریموٹ کنٹرول کے ذریعے کیا گیا، سکیورٹی فورسز نے علاقے کو گھیرلیا، علاقے میں سرچ آپریشن جاری ہے۔
پولیس کا کہنا ہےکہ دھماکے میں ممکنہ طور پر جے یو آئی نظریاتی مولانا عبدالقادر کو نشانہ بنایا گیا ہے اور دھماکا موٹرسائیکل کے ذریعے کیا گیا، جائے وقوعہ سے ایک موٹرسائیکل تباہ شدہ حال میں ملی ہے۔
پولیس کے مطابق علاقے میں فلسطینیوں کے حق میں ریلی نکالی جارہی تھی اور ریلی پر پہلے سے حملے کی بھی اطلاعات تھیں۔
چمن میں دھماکے کے بعد ڈسٹرکٹ ہیڈ کوارٹر اسپتال میں ایمرجنسی نافذ کردی گئی جب کہ علاقے کی مکمل ناکہ بندی کردی گئی ہے۔
واقع کے فوراً بعد سیکیورٹی فورسز نے جائے وقوعہ پر پہنچ کر علاقے کوسیل کر دیا۔ ہسپتال ذرائع کے مطابق زخمیوں میں سے 5 کی حالت تشویشناک ہے، جن کو فوری طور پر کوئٹہ منتقل کر دیا گیا ہے۔ پولیس ذرائع کےمطابق دھماکے میں جمیعت علماء اسلام نظریاتی کے مرکزی نائب امیر مولانا عبدالقادر لونی بھی زخمی ہوئے۔
وزیراعلی بلوچستان جام کمال اور صوبائی وزیر داخلہ نے چمن دھماکے کی شدید الفاظ میں مذمت کی ہے۔ جام کمال نے دھماکے میں قیمتی انسانی جانوں کے ضیاع پر افسوس کا اظہار کرتے ہوئے کہا کہ دہشت گرد عناصر کسی رعایت کے مستحق نہیں ہیں۔ صوبائی وزیر داخلہ نے کہا کہ متعلقہ حکام سے واقعہ کی رپورٹ طلب کر لی ہے
