عید الفطر؛ چاند دیکھنے کیلئے مرکزی رویت ہلال کمیٹی کا اجلاس طلب
پاکستان میں عید الفطر کا چاند دیکھنے کیلئے مرکزی رویت ہلال کمیٹی کا اجلاس طلب کرلیا گیا ہے جبکہ اس حوالے سے جاری اعلامیے میں کہا گیا ہے کہ مرکزی رویت ہلال کمیٹی کا اجلاس 20 اپریل بروز جمعرات (29 رمضان المبارک) وزارت مذہبی امور اسلام آباد میں ہوگا۔
اعلامیے کے مطابق مرکزی رویت ہلال کمیٹی کے اجلاس کی صدارت چیئرمین مولانا عبدالخبیر آزاد کریں گے اور اعلامیے کے مطابق زونل کمیٹیوں کے اجلاس ملک بھر میں مقررہ مقاما ت پر ہوں گے۔ یاد رہے کہ گزشتہ 22 مارچ کو ملک میں رمضان المبارک 1444 ہجری کا چاند نظر آیا تھا اور جمعرات کو پہلا روزہ ہوا تھا۔ خیال رہے کہ مرکزی رویت ہلال کمیٹی کے چیئرمین عبدالخبیر آزاد نے اعلان کیا تھا کہ ملک میں چاند نظر آنے کی شہادتیں موصول ہوئی ہیں۔
انہوں نے بتایا تھا کہ بہاولپور، رحیم یار خان، صوابی، قلعہ سیف اللہ اور مردان سے چاند کی شہادت موصول ہوئیں جس کے بعد متفقہ فیصلہ کیا گیا کہ ملک میں 23 مارچ بروز جمعرات پہلا روزہ ہوگا۔ علاوہ ازیں رمضان المبارک کا چاند دیکھنے کے لیے ملک بھر میں زونل کمیٹی کے اجلاس بھی ہوئے تھے۔
