چین نے خطرے کے پیش نظر سیکورٹی گاڑیاں پاکستان روانہ کردیں
گلگت: چین نے چینی باشندوں کی حفاظت کے لیے مخصوص اور بلٹ پروف گاڑیاں پاکستان بھیج دیں، سی پیک منصوبوں اور چینی باشندوں کی حفاظت کے لیے سیکیورٹی گاڑیوں اور موٹر سائیکلوں کی پہلی کھیپ گلگت پہنچ گئی۔
آئی جی گلگت بلتستان ثناء اللہ عباسی کے مطابق سی پیک اسپیشل پروٹیکشن یونٹ (ایس پی یو) کے لیے 15 گاڑیاں اور 20 موٹر سائیکل خریدے گئے ہیں جبکہ مزید 13 گاڑیاں اور موٹر سائیکل اگلے ہفتہ گلگت پہنچ جائیں گے۔
انہوں نے کہا کہ اسپیشل پروٹیکشن یونٹ کے قیام سے پاک چین اقتصادی راہداری منصوبے کے تحفظ کو یقینی بنایا جائے گا جس کے لیے 12 کروڑ روپے کی لاگت سے 63 گاڑیاں خریدی جا رہی ہیں جبکہ 30 گاڑیوں کی خریداری کے لیے حکومت سے این او سی طلب کیا ہے۔
آئی جی گلگت بلتستان ثناء اللہ عباسی نے کہا کہ 4 سو 67 اہلکاروں پر مشتمل اسپیشل پروٹیکشن یونٹ کو جدید خطوط پر تربیت دی جا رہی ہے۔اس موقع پر آئی جی گلگت بلتستان ثناء اللہ عباسی نے سینٹرل پولیس آفس میں آئی جی گلگت بلتستان ثناء اللہ عباسی نے گاڑیوں اور موٹر سائیکلوں کی چابیاں ایس پی یو کے سربراہ کے حوالے کیں۔
