کولمبو (اے پی پی) چائنہ نے سری لنکا کو بحری جہاز تحفے میں بھجوادیا.
تفصیلات کے مطابق سری لنکا میں منعقد خصوصی تقریب میں چین کی جانب سے دیے جانے والے بحری جہاز کو باقاعدہ طور پر سری لنکا کی بحریہ میں شامل کرلیا گیا ہے۔ سری لنکا کے صدر میتھری پالا، بحریہ کے کمانڈر ڈی سلوا، سری لنکا میں تعینات چینی سفیر چن شیو، چینی فوجی اتاشی شیو جیانگ وی اور سری لنکا کی فوجی و حکومتی عہدیداروں نے تقریب میں شرکت کی۔ سری لنکا کے صدر میتھری پالا نے بحری جہاز کی شاندار کارکردگی کو سراہا اوراس قیمتی تحفے کے لیے چینی حکومت کا شکریہ ادا کیا۔
چین کی جانب سے تحفتاً دیا جانے والا یہ بحری جہاز نزدیکی سمندرمیں گشت اور جاسوسی جبکہ سمندر میں دور جا کر سلامتی ، تلاش اور بچاؤ کی امداد ی سرگرمیوں سمیت دیگر مشنز سرانجام دے گا۔
