فیصل آباد (عثمان صادق) ڈویژنل کمشنرزاہد حسین نے کہا ہے کہ مذہبی وقومی تہواروں کو منانے کے سلسلے میں پاکستانی قوم کی خوشیاں سانجھی ہیں اس سلسلے میں اقلیتی برادری کی خوشیوں میں برابر کے شریک ہیں۔انہوں نے یہ بات اپنے آفس میں مسلم مسیحی رہنماؤں کے ہمراہ کرسمس کیک کاٹتے ہوئے کہی۔کمشنر نے ڈویژن بھر میں بین المذاہب ہم آہنگی کے شاندارماحول کو سراہا اور مسیحی برداری کو کرسمس کی مبارکباد دیتے ہوئے کہا کہ اقلیتی برادری ملک وقوم کی ترقی وخوشحالی میں جاندار کردار ادا کررہی ہے جن کی خدمات کو نظرانداز نہیں کیا جاسکتا۔انہوں نے سرکاری محکموں واداروں میں خدمات انجام دینے والے مسیحی سٹاف کے جذبہ خدمت کو سراہتے ہوئے کہا کہ فرائض کی ادائیگی بھی خاموش عبادت کا درجہ رکھتی ہے لہذا وہ آئندہ بھی بھرپورعزم کے ساتھ اپنی خدمات کا معیار برقرار رکھیں۔انہوں نے بتایا کہ ڈویژنل انتظامیہ کی طرف سے ڈویژن بھر میں کرسمس کی تقریبات کے خوشگوار انعقاد کے سلسلے میں جامع اقدامات کئے گئے ہیں جن کے تحت کرسمس سستے بازاروں کے انعقاد،گرجا گروں کی سیکورٹی میں اضافہ اور صفائی ستھرائی کے ساتھ ساتھ ان کی سہولت کے لئے تفریحی مقامات پر بھی خصوصی انتظامات ہونگے۔انہوں نے مسیحی برادری سے کہا کہ وہ احساس تحفظ کے ساتھ نظم وضبط اور ذمہ دارانہ انداز میں کرسمس کی خوشیاں منائیں۔مسیحی رہنماؤں نے کیک کاٹنے کی تقریب کے انعقاد پر کمشنرزاہد حسین کا شکریہ ادا کرتے ہوئے کہا کرسمس قومی یکجہتی کے ساتھ امن وسلامتی کا پیغام ہے۔انہوں نے کہا کہ خوشیاں بانٹنے سے بڑھتی ہیں اس سلسلے میں ہمارا ایک دوسرے کی خوشیوں میں شریک ہونا ایک متحد قوم ہونے کی علامت ہے.
جملہ حقوق محفوظ ہیں۔ باغی ٹی وی 2025