آرمی چیف جنرل عاصم منیر کا دورہ ایران مکمل، اہم امور زیر بحث

پاک فوج کے شعبہ تعلقات عامہ کے مطابق آرمی چیف جنرل عاصم منیر کا دو روزہ دورہ ایران مکمل ہو گیا ہے، اس دوران سربراہ پاک فوج نے ایرانی عسکری قیادت سے تفصیلی ملاقاتیں کیں۔ آئی ایس پی آر کا مزید کہنا تھا کہ بارڈر بارے تحفظات اور دہشتگردی بارے بھی بات ہوئی جبکہ ایک دوسرے کے ساتھ انٹیلی جنس نیٹورک شیئرنگ بارے بھی گفتگو کی گئی، علاوہ ازی ابراہیم رئیسی نے پاک فوج کے سربراہ جنرل سید عاصم منیر سے تہران میں ملاقات کی اور ہم خیال اور مسلم ملکوں کے ساتھ تعلقات میں توسیع کو ایران کی خارجہ پالیسی کی ترجیحات میں قرار دیتے ہوئے کہا کہ باہمی معاہدوں پر عمل در آمد کی رفتار میں تیزی سے ایران و پاکستان کے درمیان معاشی و تجارتی تعاون میں بہتری پیدا ہوگی اور اس کے نتیجے میں دونوں پڑوسیوں کے سیاسی تعلقات بھی مضبوط ہوں گے۔

آئی ایس پی آر کے مطابق آرمی چیف کی ایرانی صدر ابراہیم رئیسی اور وزیرخارجہ ایچ ای حسین امیر عبداللہ سے ملاقاتیں ہوئیں، جس میں علاقائی امن و استحکام کے لیے پاکستان ایران دوطرفہ تعلقات کی اہمیت پر روشنی ڈالی گئی۔ آئی ایس پی آر کے مطابق سربراہ پاک فوج جنرل عاصم منیر کی ایرانی مسلح افواج کے چیف آف جنرل اسٹاف جنرل محمد باقری سے بھی ملاقات ہوئی، جس میں دونوں اطراف کے فوجی کمانڈروں نے اس بات پر اتفاق کیا کہ دہشت گردی خطے کے لیے بالعموم اور دونوں ممالک کے لیے بالخصوص مشترکہ خطرہ ہے۔

آئی ایس پی آر کا کہنا ہے کہ دونوں ممالک کی عسکری قیادت نے اس عزم کا اعادہ کیا کہ انٹیلی جنس کے تبادلے سے سرحدی علاقوں میں دہشتگردی کی لعنت کو جڑ سے اکھاڑ پھینکا جائے گا، جب کہ دہشت گردوں کے نیٹ ورک کے خلاف موثر ایکشن پر بھی اتفاق کیا گیا، اور سیکورٹی کے شعبے میں تعاون بڑھانے کے راستے تلاش کرنے کا عزم کیا۔ آئی ایس پی آر کے مطابق آرمی چیف جنرل عاصم منیر کی آمد پر ایرانی مسلح افواج کے چاق و چوبند دستے نے ملٹری ہیڈ کوارٹرز میں گارڈ آف آنر بھی پیش کیا۔

ایرانی میڈیا کے مطابق رئيسی نے اسی طرح علاقائی ملکوں کے تعلقات خراب کرنے کی دشمنوں کی کوششوں کا ذکر کیا اور موجودہ گنجائشوں اور باہمی لین دین میں اضافے کے ذریعے باہمی تعاون میں اضافے کی ضرورت پر زور دیا۔ جنرل عاصم منیر کی ایرانی صدر کے ساتھ ملاقات میں سرحدوں کے تحفظ، دہشت گردی کے خلاف جنگ اور جغرافیائی سالمیت کے لیے مل کر کام کرنے پراتفاق کیا گیا ہے۔

ملاقات میں پاک فوج کے سربراہ سید عاصم منیر نے بھی پڑوسیوں خاص طور پر پاکستان کے ساتھ تعلقات میں توسیع کی ایران کی پالیسیوں کو سراہا اور اسے عالم اسلام کے لئے خاص قرار دیا۔ جنرل عاصم منیر نے ایران اور پاکستان کی طولانی مشترکہ سرحدوں اور سرحدی لین دین کی گنجائش کا ذکر کرتے ہوئے کہا کہ دونوں ملکوں کے درمیان تجارتی ومعاشی تعاون سے سکیورٹی کے حالات میں بہتری آئے گی۔ ہم سکیورٹی کو مضبوط بنانے کی کوششوں میں مصروف ہیں۔

اس سے قبل پاکستانی فوج کے سربراہ جنرل عاصم منیر نے ایرانی وزير خارجہ حسین امیر عبد اللھیان سے بھی ملاقات کی تھی، وزير خارجہ حسین امیر عبد اللہیان اور جنرل عاصم منیر کی ملاقات میں باہمی دلچپسی اور علاقائی امور پر تبادلہ خیال کیا گيا تھا ۔ جبکہ گزشتہ دو دنوں کے دوران جنرل سید عاصم منیر نے ایرانی فوج کے سربراہ محمد باقری پاسداران انقلاب اسلامی کے سربراہ جنرل حسین سلامی سمیت کئی اعلی عہدیداروں سے ملاقات کی ہے۔