عالمی وبا کورونا وائرس کے باعث کوکا کولا فوڈ اینڈ میوزک فیسٹیول آن لائن منعقد کرنے کا اعلان

گزشتہ سالل دسمبر سے دنیا بھر میں عالمی وبا کورونا وائرس کی وجہ سے جہاں کاروباری اور تعلیمی نظام متا ثر ہوئے وہیں سماجی دوری کی وجہ سے ثقافتی سرگرمیاں ، ایوارڈ شوز، میوزک کنسرٹس بھی کافی زیادہ متاثر ہوئے ہیں جبکہ متعدد فلموں کی ریلیز رُک گئی اور بعض فلموں کی شوٹنگز بھی منسوخ کرنا پڑی تاہم کئی ممالک میں کچھ آن لائن تقریبات بھی منعقد ہوئیں اسی طرح پاکستان میں بھی کئی تقریبات منسوخ ہوئیں-

باغی ٹی وی : پاکستان میں بھی کورونا وائرس کی دوسری لہر کے پیش نظر کورونا وائرس کے دوبارہ بڑھتے ہوئے کیسز کی وجہ سے رواں ماہ ملک کا پہلا ڈیجیٹل میوزک فیسٹیول منعقد کیا جارہا ہے۔

ہر سال کوک فیسٹ یعنی کوکا کولا فوڈ اینڈ میوزک فیسٹیول ملک کے مختلف شہروں میں منعقد کیا جاتا ہے جس میں گلوکاروں کی لائیو پرفارمنس بھی ہوتی ہے۔

کوک فیسٹ میں عموماً عوام کی بڑی تعداد کی شریک ہوتی ہے اور یہ 2 سے 3 روز تک جاری رہتا ہے۔

اس سال بھی 3 روزہ کوک فیسٹ کا انعقاد کیا جائے گا جو 20 سے 22 نومبر تک جاری رہے گا تاہم کورونا وائرس کی وجہ سے یہ فیسٹیول آن لائن منعقد ہوگا جو ملک کا پہلا ڈیجیٹل میوزک فیسٹیول بھی ہوگا۔

کوکا کولا پاکستان کے انسٹاگرام اکاؤنٹ پر جاری تفصیلات کے مطابق رواں برس کوک فیسٹ کو پاکستان کے آن لائن میوزک اسٹریمنگ پلیٹ فارم پٹاری اور آن ڈیمانڈ ویڈیو پلیٹ فارم ٹیپ میڈ کے اشتراک سے پیش کیا جائے گا۔

کوک فیسٹ کی ویب سائٹ کے مطابق میوزک فیسٹیول میں شرکت مفت ہوگی جس کے لیے شائقین کو میوزک اسٹریمنگ ایپ پر رجسٹر کرنا لازمی ہوگا۔

جس کے بعد موصول ہونے والے منفرد کوڈ کے ذریعے انہیں ٹیپ میڈ پر پرفارمنسز دیکھنے کی اجازت حاصل ہوگی۔

اس سال فوڈ فیسٹیول منعقد نہیں ہوسکے گا لیکن شائقین کو فوڈ ڈسکاؤنٹس دیئے جائیں گے-

کوک فیسٹ میں 10 آرٹسٹ اپنے فن کا مظاہرہ کریں گے جن میں 9 سالہ پاکستانی ریپر وقاص بلوچ عرف تھاؤزنڈ، نتاشا بیگ، سیرین جہانگیر، شمعون اسمٰعیل، عبداللہ صدیقی، علی نور اور دیگر شامل ہوں گے۔