پاکستان میں گزشتہ 24 گھنٹوں کے دوران کورونا وائرس کے باعث مزید 66افراد جاں بحق ہوگئے۔
باغی ٹی وی : نیشنل کمانڈ اینڈ آپریشن شینٹر (این سی او سی) کے مطابق گزشتہ 24 گھنٹوں کے دوران ملک بھر میں 57 ہزار 460 کورونا ٹیسٹ کیے گئے جس کے نتیجے میں3 ہزار 974 کورونا کیسز رپورٹ ہوئے جبکہ گزشتہ 24 گھنٹوں کے دوران کورونا مثبت کیسز کی شرح 6.91 فیصد رہی۔
این سی او سی کے مطابق گزشتہ 24 گھنٹے میں ملک بھر میں کورونا کیسز کی مجموعی تعداد11 لاکھ 9 ہزار 274 جبکہ ملک بھر میں کورونا کے باعث اموات کی مجموعی تعداد 24 ہزار639 ہو گئی۔
واضح رہے کہ وفاقی وزیر اسد عمر ںے ملاقات کے دوران برطانیہ کے قائم مقام ہائی کمشنر کو پاکستان کی جانب سے کورونا وبا کی روک تھام کے لیے اپنائی جانے والی حکمت عملی سے آگاہ کیا تھا-
اسد عمر نے قائم مقام برطانوی ہائی کمشنر سے ملاقات کے دوران کہا تھا کہ عالمی وبا پر قابو پانے میں پاکستان نے دیگر ممالک کی نسبت بہتر کارکردگی دکھائی ہے حکومت کی جامع حکمت عملی اور وزیر اعظم کے ویژن کے مطابق عوام کے جان و مال کا تحفظ کیا گیا ہے۔ پاکستان عالمی ادارہ صحت سے کورونا وبا سے متاثرہ افراد کے اعداد وشمار کا تبادلہ بھی کرتا ہے۔
وفاقی وزیر اسد عمر نے ملاقات میں بتایا تھا کہ پاکستان میں کورونا وبا کی بھارتی قسم ڈیلٹا اور بیٹا سے متاثرہ افراد کی نشاندہی کی گئی ہے دوسری جانب قائم مقام برطانوی ہائی کمشنر نے کورونا وبا سے نمٹنے کے لیے کیے گئے اقدامات کو سراہا –
