کرونا آئیسولیشن وارڈ ڈی ایچ کیو ٹیچنگ ہسپتال سرگودھا کے فوکل پرسن ڈاکٹر سکندر حیات وڑائچ نے کہا ہے کہ اس وارڈ میں روزانہ 4 سے 5 نئے مریض داخل ہو رہے ہیں۔ انہوں نے مزید کہا کہ اس وقت بھی ہمارے پاس 38 مریض داخل ہیں جن میں سے 11کی حالت تشویشناک ہے۔
انہوں نے مزید کہا کہ جو لوگ اس بیماری کے ابتدائی ایام میں داخل ہو جاتے ہیں ان کے ٹھیک ہونے کے چانسز بہت زیادہ بڑھ جاتے ہیں۔ جیسا کہ آج صرف ایک دن میں کرونا وارڈ ڈی ایچ کیو ٹیچنگ ہسپتال سرگودھا سے 9 مریض صحت یاب ہو کر ڈسچارج کئے گئے ہیں اور یہ تمام مریض وہ تھے جو بیماری کی شروعات میں ہی داخل ہو گئے تھے۔
انہوں نے مزید کہا کہ کئی لوگ مریضوں کا گھر پر علاج کرواتے رہتے ہیں اور جب ان کی حالت سیریس ہوتی ہے تو داخلے کیلئے آتے ہیں ایسے حالات میں مریض کا بچنا مشکل ہو جاتا ہے۔
انہوں نے مزید کہا کہ علاج معالجہ سے بھی بڑھ کر کرونا کی بیماری کو روکنا انتہائی ضروری ہے۔ جو صرف احتیاطی تدابیر اختیار کرکے ہی روکا جا سکتا ہے۔ عوام الناس کو چاہیے کہ جب گھر سے نکلیں ماسک پہنیں‘ سماجی فاصلہ رکھیں‘ رش والی جگہ پر جانے سے گریز کریں اور اپنے ہاتھوں کو بار بار صابن سے دھوئیں۔
