کورونا وائرس کی دوسری لہر فرانس کے 9 شہروں میں رات کا کرفیو نافذ

کورونا وائرس کی دوسری لہر فرانس کے 9 شہروں میں رات کا کرفیو نافذ

باغی ٹی وی : کورونا وائرس کی دوسری لہر سے بچنے کے لیے فرانس کے دارالحکومت پیرس سمیت 9 شہروں میں رات کا کرفیو نافذ کرنے کا فیصلہ کیا گیا ہے۔

فرانسیسی صدر ایمانویئل میکرون نے کہا ہے کہ کرفیو کا آغاز ہفتے سے ہوگا، رات نوسے صبح چھ بجے تک گھر سےنکلنے پر پابندی ہو گی۔ ملک میں صحت کی ہنگامی صورتحال کا بھی اعلان کیا گیا ہے۔

کئی دوسرے یورپی ممالک بھی کورونا کی دوسری لہر سے نمٹنے کے لیے اقدامات کر رہے ہیں۔ جرمنی اور نیدرز لینڈ میں جزوی لاک ڈاؤن لگایا گیا ہے جس کے تحت کیفے اور ریستوران بند رکھنے کا فیصلہ کیا گیا ہے۔

سپین نے بھی کورونا خدشے کے پیش نظر کیٹالونیا میں جمعرات سے 15 روز کیلئے ریستوران بند رکھنے کا اعلان کیا ہے۔ چیک ریپبلک کی حکومت نے طلبا میں وبا پھیلنے کے خطرے سے بچنے کیلئے سکول بند کرنے کے احکامات جاری کئے ہیں، مذکورہ ملک میں گزشتہ 2 ہفتوں میں ایک لاکھ افراد میں انفیکشن ریٹ 581.3 تک پہنچ گیا جس کے بعد حکومت نے سنجیدہ اقدامات اٹھائے ہیں۔ آئرلینڈ میں بھی عوام کے ایک دوسرے کے گھروں میں آنے جانے اور ملاقاتوں پر جمعرات سے پابندی کا اعلان کیا گیا ہے.
عالمی وبا کورونا وائرس کے سبب دنیا میں3 کروڑ87 لاکھ 43ہزار864 افراد متاثر اور10 لاکھ96ہزار876 ہلاک ہوچکے ہیں۔

کورونا سے صحتیاب افراد کی تعداد 2 کروڑ91 لاکھ 23ہزار542 ہوگئی ہے اور 85 لاکھ 23 ہزار446ایکٹیو کیسزہیں۔

امریکہ کورونا وائرس سے متاثر ہونے والے ممالک میں پہلے نمبر پر ہے جہاں 2 لاکھ 21 ہزار843 افراد جان کی بازی ہار چکے ہیں اور81 لاکھ 50 ہزار43 میں کورونا وائرس کی تشخیص ہوئی۔

بھارت کورونا کیسز کے اعتبار سے دنیا میں دوسرے نمبر پر ہے جہاں 73 لاکھ 5ہزار سے زائد افراد میں کورونا وائرس کی تشخیص ہوئی ایک لاکھ 11ہزار311 اموات ہوئی ہیں۔

برازیل کورونا سے متاثرہونے والے ممالک میں تیسرے نمبر پر ہے جہاں 51 لاکھ 41 ہزار سے زائد افراد متاثر ہوئے اور ایک لاکھ 51 ہزار 779 اموات ہوئی ہیں۔روس میں 13 لاکھ 40 ہزار سے زائد افراد کورونا وائرس سے متاثر ہو چکے ہیں اور اموات کی مجموعی تعداد 23ہزار205 ہو گئی ہے۔