کرکٹ کے دیوانوں‌ کیلئے ورلڈ کپ سے قبل بڑی خوشخبری، پاکستان اہم ایونٹ کی میزبانی کرے گا

کرکٹ کے چاہنے والوں کے کیلئے ورلڈ کپ کے آغاز سے قبل ہی بڑی خوشخبری سنا دی گئی ہے۔ ایشین کرکٹ کونسل کی جانب سے اگلے برس کے ایونٹ کی میزبانی پاکستان کو دے دی گئی ہے۔

باغی ٹی وی کی رپورٹ کے مطابق ایشین کرکٹ کونسل کا منگل کے دن سنگاپور میں اجلاس ہوا ہے جس میں یہ اہم فیصلہ کیا گیا ہے۔ ایشین گیمز 2018 میں کرکٹ شامل نہیں تھی تاہم 2022 کی ایشین گیمز میں کرکٹ کو شامل کرلیا گیا ہے۔

رپورٹ کے مطابق ایشین کرکٹ کونسل کے اجلاس میں اگلے سال منعقد ہونے والے ایشیا کپ کی میزبانی پاکستان کو دینے کا بھی فیصلہ کیا گیا ۔ ایشیا کپ کا فارمیٹ ٹی 20 ہوگا اور اس ایونٹ سے پہلے سکیورٹی وفد پاکستان کا دورہ کرتے ہوئے پاکستان میں سکیورٹی کے معاملات کا جائزہ لے گا۔

آئی سی سی ورلڈ کپ سے فراغت کے بعد پاکستان کرکٹ بورڈ ایشیا کپ کی تیاری کرے گا۔ واضح رہے کہ پاکستانی ٹیم ان دنوں ورلڈ کپ کی تیاریوں میں مصروف ہے اور پاکستان کرکٹ بورڈ کی طرف سے سری لنکا کو بھی لاہور اور کراچی میں میچ کھیلنے کی دعوت دی گئی ہے۔