دیبا بیگم کی زندگی کی دکھ بھری کہانی سننے والے حیرت اور افسوس میں مبتلا

کراچی : پاکستان فلم انڈسٹری کی خوبصورت ہیروئن دیبا بیگم نے اپنے ماضی کی تلخ باتیں بتا کر سننے والوں کو حیرت اور افسوس میں مبتلا کردیا۔ انہوں نے بتایا کہ انہوں نے کس طرح غربت میں زندگی گزاری۔ بہت چھوٹی سی عمر میں بھارت سے ہجرت کی جس کے بعد وہ کراچی میں رہیں اور پانچ سال کی عمر میں پہلی فلم دشمن میں اداکاری کی۔ اس کے بعد بھی کئی فلموں میں بطور چائلڈ اسٹار کام کیا، پھر کافی عرصے فارغ رہنے کے بعد 1960 میں ایک فلم میں کام کیا وہ فلم میرا ڈیبیو تھی۔ سال 1960 میں ہدایت کار فضل اے مرکری نے فلم چراغ جلتا رہا بنائی جس میں تمام نئے فنکاروں کو لیا، یہ فلم محمد علی، زیبا، غلام محی الدین، طلعت حسین اور کمال ایرانی کی بھی پہلی ڈیبیو فلم تھی۔ اداکارہ دیبا بیگم نے کہا کہ یہ فلم 1961میں ریلیز ہوئی تھی اور کراچی کے نشاط سنیما میں ہونے والے فلم کے پریمئیر شو میں محترمہ فاطمہ جناح بھی موجود تھیں۔ جنہیں اپنے ساتھ دیکھ کر ہم سب بہت پرجوش تھے۔