ڈیرہ غازیخان (باغی ٹی وی رپورٹ)ڈیرہ غازی خان ائیرپورٹ پر بڑی پیش رفت، آئندہ سال کے آخر تک ایئر بس 320 طیاروں کے لیے اپ گریڈ کا فیصلہ
تفصیلات کے مطابق پاکستان ائیرپورٹس اتھارٹی کی جانب سے چوتھی ای کچہری کا انعقاد کراچی میں کیا گیا، جس میں ملک بھر کے ہوائی اڈوں سے متعلق اہم فیصلے کیے گئے۔ ترجمان پی اے اے کے مطابق ای کچہری کے دوران فیصلہ کیا گیا کہ ڈیرہ غازی خان ائیرپورٹ کو آئندہ سال کے آخر تک اپ گریڈ کیا جائے گا تاکہ وہ ایئربس 320 طیاروں کی آمد و رفت کے قابل ہو سکے جو اس علاقے میں فضائی سفر کی سہولیات میں نمایاں بہتری کا باعث بنے گا۔
اس کے علاوہ پشاور ائیرپورٹ پر ائیرسائیڈ اور پارکنگ کی سہولیات کو مزید بہتر بنانے کا بھی فیصلہ کیا گیاتاکہ مسافروں کو سہولت میسر آ سکے۔ ترجمان کے مطابق نیو گوادر انٹرنیشنل ائیرپورٹ کے بزنس پلان کو بھی سراہا گیاجو گوادر کو ملکی و غیر ملکی ائیرلائنز کے لیے پرکشش بناتا ہے۔
ای کچہری میں ائیرلائنز کے عملے کے رویے اور مسافروں کے سامان کی گمشدگی سے متعلق شکایات کا نوٹس لیتے ہوئے ہدایت کی گئی کہ ان معاملات کی مکمل رپورٹ سول ایوی ایشن اتھارٹی کو بھجوائی جائے۔ اسی طرح لاہور ائیرپورٹ پر فرسٹ ایڈ کٹس میں ٹیٹنس کے ٹیکے شامل کرنے کی ہدایت بھی جاری کی گئی تاکہ ایمرجنسی صورت حال میں بہتر طبی سہولت میسر آ سکے۔
