ڈی آئی جی آپریشنز ساجد کیانی ڈی آئی جی آپریشنز لاہورساجد کیانی نے پولیس لائنز قلعہ گجر سنگھ میں منعقدہ اردل روم میں پولیس افسران واہلکاروں کے روبرو اپیلوں،ذاتی مسائل، ٹرانسفر وپوسٹنگ بارے شنوائی کی۔دوران اردل روم کورونا وائرس سے بچاؤ کیلئے حفاظتی تدابیر کو ملحوظ خاطر رکھا گیا۔اردل روم میں ابتک 520 جوانوں کو ان سہولت کے مطابق تعینات کیا جا چکا ہے۔
اپیلوں،ذاتی مسائل اورٹرانسفر پوسٹنگ سمیت مختلف معاملات میں پولیس ملازمین باقاعدگی سے اردل روم میں پیش ہو رہے ہیں۔ ڈی آئی جی آپریشنز لاہورساجد کیانی کا اس موقع پر کہنا تھا کہ پولیس ملازمین اپیلوں،ٹرانسفر وپوسٹنگ کیلئے سفارشیں کروانے کی بجائے میرٹ پر یقین رکھیں۔تعیناتی کی مدت، زیر التواء محکمانہ انکوائری اور دیگر قانونی وجوہات پر تبادلے نہیں کئے جائیں گے۔
ساجد کیانی نے کہا کہ اردل روم میں ذاتی شنوائی کا مقصد پولیس ملازمین کے معاملات میں سفارش کلچر کا خاتمہ ہے۔دوران ڈیوٹی غفلت اور لاپرواہی برتنے والوں کے خلاف سخت محکمانہ کارروائی کی جائے گی۔
انہوں نے مزید کہا کہ براہ راست شنوائی سے مسائل کے حل اور انتظامی امور بہتر بنانے کے حوالے سے مثبت اثرات سامنے آرہے ہیں۔تمام پولیس افسران و جوان فرائض منصبی خوش اسلوبی اور ایمانداری سے سرانجام دیں۔