عالمی مالیاتی ادارے (آئی ایم ایف) کے دباؤ پر پٹرولیم مصنوعات کی قیمتیں بڑھانے کے بعد قرض پیکیج کی ممکنہ بحالی کے اثرات ملکی کرنسی پر پڑنے لگے، امریکی ڈالر ایک مرتبہ پھر مزید سستا ہو گیا۔
اسٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں 70 پیسے کی کمی ریکارڈ کی گئی۔
https://twitter.com/StateBank_Pak/status/1531226778286673921/photo/1
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 199 روپے 76 پیسے سے کم ہو کر 199 روپے 6 پیسے ہو گئی ہے۔
گزشتہ دو کاروباری روز کے دوران انٹر بینک میں روپے کے مقابلے میں امریکی ڈالر کی قدر میں 2 روپے 95 پیسے کی تنزلی دیکھی گئی۔
اُدھر پاکستان سٹاک مارکیٹ میں اُتار چڑھاؤ کے بعد 178.69 پوائنٹس کی تیزی ریکارڈ کی گئی اور 100 انڈیکس 43040.14 پوائنٹس کی سطح پر پہنچ بند ہوا، پورے کاروباری روزکے دوران کاروبار میں 0.42 فیصد کی بہتری دیکھی گئی جبکہ 8 کروڑ 12 لاکھ 94 ہزار 999 شیئرز کا لین دین ہوا۔
