تُرک اداکار انجن التان کا ترک کینسر سوسائٹی سے مل کر کینسر کے مریضوں کے لئے مہم کا آغاز

اسلامی فتوحات پر مبنی شہرہ آفاق تُرک سیریز ’ارطغرل غازی‘ میں’ارطغرل‘ کا مرکزی کردار ادا کرنے والے ترک اداکار انجن التان نے کینسر کے مریضوں کے لیے مہم کا آغاز کیا ہے۔

باغی ٹی وی : سماجی رابطے کی ویب سائٹ انسٹاگرام پر انجن التان نے ترک کینسر سوسائٹی کے ساتھ مل کر شروع کی جانے والی مہم کے پوسٹر کی تصویر شیئر کی اورمداحوں کو اس مہم کے بارے میں تفصیل سے آگاہ کیا-
https://www.instagram.com/p/CDBPbaoAgsM/?igshid=1be15c4vn1ger
انجن التان نے اپنی پوسٹ کے کیپشن میں لکھا کہ رواں سال اُنہوں نے اپنی سالگرہ کے موقع پر ترک کینسر سوسائٹی کے ساتھ ملکر ایک مہم شروع کی ہے۔

ترک اداکار نے لکھا کہ میں چاہتا ہوں کہ اس مرتبہ میرے عزیز و اقارب مجھے سالگرہ پر تحائف دینے کے بجائے عطیہ دیں تاکہ ہم اُن پیسوں سے کینسر کے مریضوں کا علاج کرواسکیں۔

انجن التان نے لکھا کہ یہ مہم 26 جولائی تک جاری رہے گی جو کہ میری سالگرہ کا دن ہے-

انجن التان نے اپنی پوسٹ کے کیپشن میں ایک لنک بھی شیئر کی جہاں کینسر کے مریضوں کے لیے عطیہ جمع کروایا جاسکتا ہے۔

اداکار نے لکھا کہ میں ان سب کا شکریہ ادا کرنا چاہتا ہوں جنہوں نے ان کی حمایت کے لئے پیشگی طور پر چندہ دیا۔

واضح رہے کہ انجن التان 26 جولائی 1979 کو ترکی کے شہر ازمیر میں پیدا ہوئے تھے۔