ورلڈ کپ2023:
پونے:ورلڈکپ کے 40ویں میچ میں انگلینڈ نے نیدرلینڈز کو 160 رنز سے ہرادیا۔پونے میں کھیلے جانے والے اس میچ میں انگلینڈ کے 340 رنز کے ہدف کے تعاقب میں نیدرلینڈز کی ٹیم 38ویں اوور میں 179 رنز پر آل آؤٹ ہوگئی۔ نیدرلینڈز کی جانب سے تیجا ندامنورو نے 41 رنز کی ناقابلِ شکست اننگز کھیلی۔ کپتان اسکاٹ ایڈورڈز نے 38، اوپنر ویسلے بریسی نے 37 رنز کی اننگز کھیلیں۔
انگلینڈ کی جانب سے معین علی اور عادل رشید نے تین تین وکٹیں لیں۔ ڈیوڈ ولے نے دو جبکہ کرس ووکس نے ایک کھلاڑی کو آؤٹ کیا،.
اس فتح کے ساتھ انگلینڈ نے چیمپئنز ٹرافی 2025 کی کوالیفکیشن کیلئے راہ ہموار کرلی۔
پہلی اننگز
آئی سی سی ورلڈکپ میں انگلینڈ نے بین اسٹوکس کی شاندار سنچری کی بدولت نیدرلینڈز کو جیت کیلئے 340 رنز کا ہدف دے دیا۔پونے میں کھیلے جارہے آئی سی سی کے ورلڈکپ کے 40 ویں میچ میں انگلینڈ کے کپتان جوز بٹلر نے نیدرلینڈز کیخلاف پہلے بیٹنگ کا فیصلہ کیا۔ انگلینڈ نے مقررہ 50 اوورز میں 9 وکٹوں کے نقصان پر 339 رنز بنائے، بین اسٹوکس 108 رنز کی اننگز کھیل کر نمایاں رہے۔ان کی 84 گیندوں پر مشتمل اننگز میں 6 چھکے، 6چوکے شامل تھے۔ اس کے علاہ ڈاؤڈ ملان 87 اور کرس ووکس نے 51 رنز اسکور کیے، جونی بیرسٹو 15، جو روٹ 28 ، ہیری بروک 11 اورکپتان جوز بٹلر صرف 5 رنز بناکر پویلین لوٹ گئے۔ نیدرلینڈز کی جانب سے باسڈی لیڈا نے 3وکٹیں حاصل کیں جبکہ آریان دت اور لوگن وان بیک نے 2، 2 اور میکارین نے ایک وکٹ لی۔
واضح رہے کہ دفاعی چیمپئن انگلینڈ پہلے ہی سیمی فائنل کی دوڑ سے باہر ہوچکا ہے۔ورلڈکپ کے پوائنٹس ٹیبل کو دیکھا جائے اس فہرست میں انگلینڈ 10 ویں اور نیدرلینڈز کی ٹیم 9 ویں نمبر پر موجود ہے
ٹاس
انگلینڈ نے نیدر لینڈز کے خلاف ٹاس جیت کر پہلے بیٹنگ کرنے کا فیصلہ کر لیا. دونوں ٹیموں کے درمیان یہ میچ پونے میں کھیلا جارہا ہے۔
اس ورلڈ کپ میں اب تک دونوں ٹیمیں سات سات میچز کھیل چکی ہیں۔ جس میں انگلینڈ کو 1 اور نیدر لینڈز کو اپنے 2 میچز جیتے کا موقع ملا ہے، پوائنٹس ٹیبل پر نیدر لینڈز نویں اور انگلینڈ دسویں (آخری) نمبر پر ہے۔ واضح رہے کہ اس میچ کے فیصلے سے دیگر ٹیموں کے ورلڈ کپ میں آگے جانے یا نہ جانے کے حوالے سے کوئی اثر نہیں پڑے گا۔
