لاہور: نواز شریف کے منہ سے نکلا ہوا ہر لفظ، ہر جملہ پارٹی کیلئے مقدّس اورمقدّم ہے: احسن اقبال نے عقیدہ بیان کردیا ،اطلاعات کے مطابق ن لیگ کے رہنما احسن اقبال نے کہا ہے کہ نواز شریف کا ہر لفظ، ہر جملہ پارٹی کیلئےمقدس اور مقدم ہے، اے پی سی کے بعد حکومتی ایوانوں میں زلزلہ بپا ہے، سابق وزیراعظم کے وژن کو سیاسی ڈاکٹرائن سمجھتے ہیں، اے پی سی کے بعد اپوزیشن کی آواز کو دھمکیوں سے دبانے کی کوششیں کی جا رہی ہیں۔
احسن اقبال کا کہنا تھا (ن) لیگ کیخلاف نیب گردی کی نئی لہر برپا کر دی گئی، بد گمانی پھیلانے والے شر انگیزی سے کام لے رہے ہیں، وزرا غیر ذمہ داری کا مظاہرہ کر رہے ہیں، وزرا اپنے بیانات سے بحران کو جنم دیتے ہیں۔ انہوں نے کہا پی ٹی آئی کو آ رٹی ایس سسٹم کے ذریعے کامیاب کرایا گیا، اپوزیشن کی اکثریت کو اقلیت میں بدل دیا گیا، جادو منتر سے پی ٹی آئی اقتدار میں آئی۔
لیگی رہنما نے مزید کہا حکومت سارا زور کردار کشی پر صرف کر رہی ہے، وسیم اکرم پلس کو ریورس سوئنگ تو نہیں آئی مگر پنجاب کی ترقی کو ریورس کیا جا رہا ہے۔ انہوں نے کہا حکومت گلگت بلتستان کے الیکشن میں پری پول دھاندلی کرنا چاہتی ہے، حکومت من پسند افراد کو لانے کیلئے اپوزیشن کے ہاتھ پاؤں باندھنا چاہتی ہے۔
