کوئٹہ:کوئٹہ میں زور دار دھماکے میں ایک شخص جاں بحق اور 9 افراد زخمی ہوگئے۔ریسکیو کے مطابق کوئٹہ کے علاقے پود کلی چوک پر رکشہ کے قریب زور دار دھماکا ہوا۔
دھماکے کے بعد پولیس اور فورسز کی بھاری نفری علاقے میں پہنچ گئی، ریسکیو ٹیمیں امدادی کاموں میں مصروف ہیں۔بم ڈسپوزل اسکواڈ کو بھی طلب کرلیا گیا ہے، پولیس کا کہنا تھا کہ دھماکے کی نوعیت کا تعین کیا جارہا ہے۔
حکام کے مطابق دھماکے کے 9 زخمیوں کو سول اسپتال کوئٹہ منتقل کیا گیا ہے، 5 زخمیوں کو ابتدائی طبی امداد کی فراہمی کے بعد ٹراما سینٹر منتقل کردیا گیا۔دھماکے کی زد میں آنیوالا رکشہ تقریباً تباہ ہوگیا جبکہ کئی گاڑیوں اور قریبی عمارتوں کو بھی نقصان پہنچا ہے۔
پولیس کا کہنا ہے کہ ابتدائی اطلاع کے مطابق دھماکہ دستی بم سے ہوا ہے۔ دھماکے کے باعث ایک رکشہ اور قریبی دکانوں کے شیشے ٹوٹ گئے۔
دھماکے کے زخمیوں کو سول اسپتال اور بی ایم سی پہنچایا جارہا ہے۔دھماکے کے بعد سیکیورٹی فورسز نے علاقے کو گھیرے میں لے کر تحقیقات کا آغاز کردیا ہے۔