پیپلز پارٹی کی جانب سے ن لیگ کو دیا گیا داغ مفارقت کا زخم ابھی تازہ ہے: فیاض الحسن چوہان

وزیر جیل خانہ جات پنجاں فیاض الحسن چوہان نے مریم اورنگزیب کی پریس کانفرنس پر ردعمل سامنے آگیا۔ فیاض الحسن چوہان کا کہنا تھا کے پیپلز پارٹی کی جانب سے ن لیگ کو دیا گیا داغ مفارقت کا زخم ابھی تازہ ہے۔ مفاہمتی سیاست کی پرنانی نے ن لیگ کے ساتھ شریکے داری توڑ کر ن لیگ کے ہوش اڑا دیئے ہیں۔ اسی جدائی کی چیخ و پکار اب لیگی ترجمانوں کے بیانات کی صورت میں عوام کو برداشت کرنا پڑ رہی ہے۔ شاہد خاقان عباسی نے بیک جنبش قلم شریف خاندان کو نوازنے کے لیے 20 ارب کی سبسڈی کا فرمان جاری کیا ہے۔ اب لیگی ترجمان کس منہ سے سردار عثمان بزدار پر سبسڈیز دینے کا الزام لگا رہے ہیں۔ حقیقت یہ ہے کہ نواز شریف نے پاکستان کو ایسی ترقی دی جسکی سزا پاکستان آج تک بھگت رہا ہے۔ شریف خاندان نے اپنی تابناک کرپشن سے ملک کو خساروں، قرضوں اور معاشی بدحالی کے سوا کچھ نہ دیا۔ ن لیگی دور نے پاکستان کو 94 ارب ڈالر بیرونی اور 1200 ارب کے گردشی قرضوں کا تحفہ دیا۔ ن لیگ نے 2700 ارب کے بجٹ خسارے اور 16 ارب ڈالرز کے کرنٹ اکاؤنٹ خسارے کے ساتھ ملک ہمارے حوالے کیا۔ سوئی گیس 157 ارب، سٹیل مل 187 ارب، ریلوے 37 ارب اور پی آئی اے 360 ارب خسارے کے ساتھ چھوڑا۔ مزید برآں لیگی دور میں یوٹیلیٹی سٹورز 14 ارب جبکہ میٹرو بس منصوبہ 8 ارب کے خسارے میں گیا۔ شریف خاندان کی پاکستان میں عجب ترقی کی غضب کہانی سمجھ سے بالاتر ہے۔ پاکستان کو برباد کر دینے والے ایک اور موقع کے لیے ایڑھیاں رگڑ رہے ہیں۔