ایف بی آر کا فری لانسرز اور آن لائن کاروبارکرنیوالوں کیخلاف کریک ڈوان کا فیصلہ، تحقیقات میں 27 بینک بھی شامل

انکم ٹیکس کے تحقیقاتی ادارے فیڈرل بورڈ آف ریونیو (ایف بی آر) نے فری لانسرز اور آن لائن مصنوعات فروخت کرنے والوں کے خلاف کریک ڈوان کا فیصلہ کرلیاہے۔

باغی ٹی وی : میڈیا رپورٹس کے مطابق اس حوالے سے ایف بی آر کمشنر آف شور ٹیکس اور ڈائریکٹرجنرل انٹرنیشنل ٹیکس نے مشترکہ طورپر تحقیقات کا آغاز کردیا ہے۔ ایف بی آر حکام نے انکشاف کیا ہے کہ بیرون ملک مصنوعات اور خدمات فروخت کرنے والے ٹیکس ادا نہیں کررہے ہیں۔

حکام کے مطابق امریکی کمپنی Payoneer نے پاکستان میں بڑے پیمانے پر ادائیگیاں کی ہیں ابتدائی تحقیقات کے دوران اس امر کی نشاندہی ہوئی ہے کہ مذ کورہ امریکی کمپنی نے 60 ارب روپے 75615 افراد کو ادا کیے ہیں لہذا اس امریکی کمپنی سے رقم وصول کرنے والے 45012 افراد پر ٹیکس عائد ہوتا ہے۔

رپورٹس کے مطابق ایف بی آر حکام کا کہنا ہے کہ امریکی کمپنی سے رقم وصول کرنے والوں میں 12 ہزار سے زائد نان فائلرز ہیں مذکورہ امریکی کمپنی میں اکاؤنٹ بنانے کے بعد مقامی موبائل بینک یا کمرشل بینک اکاؤنٹ میں رقم منتقل ہورہی ہے-

رپورٹس کے مطابق ان معلومات کی بنیاد پرایف بی آر نے مذکورہ امریکی کمپنی کی رقم منتقل کرنے والے 27 بینکوں کو بھی تحقیقات میں شامل کیا ہے اور ٹیکس ادا نہ کرنے والوں کو نوٹسز جاری کردیئے ہیں۔