وفاقی وزیر سالک حسین کا پاک ترک بزنس کونسل کا دورہ

اسلام آباد:وفاقی وزیر سالک حسین اور سیکرٹری بورڈ آف انوسٹمنٹ نے پاک ترک بزنس کونسل کا دورہ کیا ہے اور اس دوران پاکستانی وفد کو پاک ترک بزنس کونسل کے صدر نے خوش آمدید کہا ۔

وفاقی وزیر برائے سرمایہ کاری چوہدری سالک حسین کی مختلف کاروباری وفود سے ملاقاتیں ہوئیں دوران ملاقات دو طرفہ تجارت اور سرمایہ کاری کو بڑھانے میں مختلف ترک سرمایہ کاروں کی تجاویز کو سراہا گیا جبکہ وفاقی وزیر کا دو طرفہ تجارت کو پانچ ارب ڈالر تک بڑھانے کی مختلف تجاویز پر تبادلہ خیال بھی ہوا۔

وفاقی وزیراورسیکرٹری سرمایہ کاری بورڈ کی جانب سے ترک کمپنیوں کو پاکستان میں خصوصاً سی پیک سے متعلق منصوبوں میں سرمایہ کاری کی دعوت دی گئی

اس موقع پر وفاقی وزیر چوہدری سالک نے کہا کہ ترک سرمایہ کاروں کو حکومت پاکستان کی جانب سے ہر طرح کی سہولیات فراہم کی جائیں گی، پاکستان میں قائم 22 اسپیشل اکنامک زونز میں سرمایہ کاری کے وسیع مواقع موجود ہیں

ادھر آج مسلم لیگ ق کے رکن قومی اسمبلی چودھری مونس الہٰی خود ایف آئی اے لاہور کے دفتر پہنچ گئے اس دوران انہوں نے کہا کہ گرفتارکرنا ہے تو کرلیں۔

اس موقع پر میڈیا سے گفتگو کرتے ہوئے انہوں نے کہا کہ وہ حاضر ہیں، انہیں کیس میں پیش ہونے پرکوئی اعتراض نہیں، انہیں پتہ نہیں ہے، رانا ثنا اللہ کہہ رہے ہیں 72کروڑ روپے کا کیس ہے، اس میں کوئی دو رائے نہیں کہ یہ سیاسی انتقام ہے۔

مونس الٰہی نے کہا کہ انہوں نے مجھے گرفتار کرنے کیلئے ٹیمیں تیارکیں، میری اطلاع کے مطابق انہوں نےمجھ پر شوگر کمیشن کاکیس بنایا ہے، رانا ثنا اللہ کہہ رہے ہیں کہ نوٹس بھیجاہے لیکن مجھے کسی قسم کا نوٹس نہیں ملا، مجھے انہوں نے گرفتار کرنا ہے میں حاضر ہوں، ابھی جاکر دیکھتا ہوں کیا کیس ہے۔