گوجرانوالہ,باغی ٹی وی (نامہ نگارمحمدرمضان نوشاہی) ایف آئی اے نے ویزا فراڈ اور انسانی سمگلنگ میں ملوث 3 ملزمان کو گرفتار کر لیا۔
تفصیلات کے مطابقفیڈرل انویسٹی گیشن ایجنسی (ایف آئی اے) گوجرانوالہ نے ویزا فراڈ اور انسانی سمگلنگ میں ملوث 3 ملزمان کو گرفتار کر لیا ہے۔ حکام کے مطابق ایف آئی اے گوجرانوالہ زون نے کھاریاں اور گوجرانوالہ میں کارروائی کرتے ہوئے ملزمان کو گرفتار کیا۔ گرفتار ملزمان کی شناخت ساجد محمود، محمد افضل اور وسکین احمد کے ناموں سے ہوئی ہے۔
ملزم ساجد محمود نے ایک شہری کو اٹلی میں ملازمت دلانے کے وعدے پر 8 لاکھ 60 ہزار روپے بٹورے، جبکہ محمد افضل اور وسکین احمد نے شہریوں کو ملائیشیا بھجوانے کے لیے 55 لاکھ روپے وصول کیے۔ تاہم ملزمان شہریوں کو بیرون ملک بھجوانے میں ناکام رہے اور بھاری رقوم لے کر روپوش ہو گئے۔
ایف آئی اے حکام کا کہنا ہے کہ غیر قانونی انسانی سمگلنگ میں ملوث عناصر کے خلاف کارروائیاں جاری رہیں گی۔
