بہت جلد افغان طالبان سے 13 ہزار امریکی فوجیوں کی محفوظ واپسی کا معاہدہ ہوجائے گا ، زلمے خلیل زاد

دوحہ:افغان طالبان اور امریکہ کے درمیان مذاکرات کا فائنل راونڈ شروع ، افغان طالبان سے بہت جلد امریکی فوجیوں کی محفوظ واپسی کا معاہدہ ہوجائے گا، اس سلسلے میں‌ امریکی نمائندہ خصوصی زلمے خلیل زاد پھر قطر روانہ ہو گئے۔ ان کا کہنا ہے کہ طالبان کے ساتھ مذاکرات کے کامیاب اختتام کے قریب ہیں۔زلمے خلیل زاد نے قطر روانگی سے قبل کہا کہ امریکا دوحہ میں بقیہ تمام معاملات کے تصفیے کے لیے تیار ہے۔

امریکی خصوصی ایلچی نے کہا کہ امن عمل کی کامیابی سے افغان عوام داعش کو شکست دینے کی مزید مضبوط پوزیشن میں آ جائیں گے۔انہوں نے اپنے ٹوئٹر پیغام میں افغان امن عمل اور بین الافغان مذاکرات کو تیز کرنے کی ضرورت پر زور دیا۔

امریکی ذرائع ابلاغ کے مطابق ٹرمپ نومبر 2020 میں امریکی انتخابات سے پہلے افغانستان سے 13 ہزار سے زائد امریکی فوجیوں کی واپسی پر زور دے رہے ہیں۔دوحہ مذاکرات کے نئے راؤنڈ میں امریکی انخلا کی ٹائم لائن طے کرنے کے بدلے تشدد میں کمی اور داعش یا القاعدہ کو تحفظ فراہم نہ کرنے کے افغان طالبان کے وعدے پر توجہ مرکوز کی جائے گی۔