اسلام آباد:سابق وزیراعظم میرظفراللہ جمالی کی وفات پروزیراعظم ،صدرمملکت ،قومی رہنماوں کا اظہارتعزیت اورخدمات پرخراج تحسین پیش کرتے ہوئے اللہ کے حضوربخشش کی دعائیں کی ہیں ،
اطلاعات کے مطابق سابق وزیراعظم کی وفات پر وزیراعظم عمران خان سابق وزیراعظم میر ظفر اللہ خان جمالی کے انتقال پر افسوس کا اظہار کرتے ہوئے مرحوم کے درجات کی بلندی کیلئے دعا کی ہے۔
وزیراعظم عمران خان کی جانب سے سماجی رابطوں کی ویب سائٹ ٹویٹر پر جاری تعزیتی پیغام میں کہا گیا ہے کہ مجھے میر ظفر اللہ خان جمالی کے انتقال کا سن کر بہت افسوس ہوا، اللہ تعالیٰ سے دعا ہے کہ وہ ان کے اہلخانہ کو صبر جمیل عطا کرے۔
میر ظفر اللہ خان جمالی کی رحلت کی اطلاع پا کر نہایت افسردہ ہوں۔ انا للہ وانا الیہ راجعون۔ میری تمام تر دعائیں اور ہمدردیاں انکے اہل خانہ کے ساتھ ہیں۔
— Imran Khan (@ImranKhanPTI) December 2, 2020
صدر مملکت کی جانب سے میر ظفر اللہ خان جمالی کے انتقال پر افسوس کا اظہار کرتے ہوئے مرحوم کے درجات کی بلندی اور اہلخانہ کو اس صدمے کو جھیلنے کی دعا کی گئی ہے۔
دوسری جانب آرمی چیف جنرل قمر جاوید باجوہ نے بھی سابق وزیراعظم میر ظفر اللہ خان جمالی کے انتقال پر گہرے دکھ اور افسوس کا اظہار کیا ہے۔
پاک فوج کے ترجمان کی جانب سے جاری ٹویٹ کے مطابق آرمی چیف جنرل قمر جاوید باجوہ کا کہنا تھا کہ اللہ تعالیٰ سے دعا ہے کہ وہ مرحوم کی روح کو اپنے جوار رحمت میں جگہ عطا فرمائے اور ان کے اہلخانہ کو یہ دکھ صبر واستقامت سے برداشت کرنے کی توفیق عطا فرمائے آمین۔
General Qamar Javed Bajwa, #COAS, expresses heartfelt condolences on the sad demise of former Prime Minister of Pakistan Mir Zafarullah Khan Jamali. “May Allah bless his soul & give strength to the bereaved family to bear this irreparable loss, Ameen”, COAS.
— DG ISPR (@OfficialDGISPR) December 2, 2020
سینیٹ کے چیئرمین صادق سنجرانی نے بھی ان کی وفات پراظہارافسوس کرتے ہوئے ان کی مغفرت کے لیے دعائیں کیں
سابق وزیرخارجہ اورمیرظفراللہ جمالی کے معتمد خاص میاں خورشید قصوری نے بھی ان کی وفات پرگہرے دکھ کا اظہارکیا ہے ، میاں خورشید محمود قصوری نے سابق وزیراعظم کی ملک وقوم کے لیے خدمات پران کوخراج تحسین بھی پیش کیا اوران کی مغفرت کی دعائیں بھی کیں
اس کے علاوہ وفاقی وزیر فیصل واوڈا، وزیر داخلہ اعجاز احمد شاہ، وزیر ریلوے شیخ رشید، سپیکر قومی اسمبلی اسد قیصر، وزیر خارجہ مخدوم شاہ محمود قریشی، وفاقی وزیر ایوی ایشن ڈویژن غلام سرور خان، سینیٹ میں قائد حزب اختلاف سینیٹر راجہ محمد ظفر الحق، چودھری شجاعت حسین، چودھری پرویز الہیٰ اور وزیراعلیٰ پنجاب سردار عثمان بزدار سمیت دیگر شخصیات نے سابق وزیراعظم میر ظفر اللہ جمالی کے انتقال پر گہرے افسوس کا اظہار کیا ہے۔
وفاقی وزیر داخلہ اعجاز احمد شاہ کا کہنا تھا کہ میر ظفر اللہ خان جمالی نے ہمیشہ اپنی روایات کو زندہ رکھا اور قول وفعل میں اتفاق کی مثال قائم کی۔ ان کی خدمات کو ہمیشہ یاد رکھا جائے گا۔ ان کے انتقال کا سن کر دلی دکھ ہوا۔
سابق وزیراعظم کے یار خاص وزیر ریلوے شیخ رشید احمد نے سابق وزیراعظم میر ظفراللہ خان جمالی کی وفات پر دکھ اور افسوس کا اظہار کیا ہے۔ سینیٹ میں قائد حزب اختلاف سینیٹر راجہ محمد ظفر الحق نے بھی ان کی وفات پر گہرے دکھ کا اظہار کرتے ہوئے مرحوم کی مغفرت کیلئے دعا کی ہے۔
وزیر خارجہ مخدوم شاہ محمود قریشی نے میر ظفر اللہ جمالی کے انتقال پر اظہار تعزیت کرتے ہوئے کہا کہ میں یہ خبر سن کر دل گرفتہ ہوں۔ مرحوم ایک منجھے ہوئے سیاستدان تھے۔ وہ ایک انتہائی شفیق اور وضع دار شخصیت کے حامل تھے۔ مرحوم سیاست میں رواداری کی روشن مثال تھے۔ ان کے لواحقین اور پسماندگان کیساتھ دلی اظہار تعزیت کرتا ہوں۔
وزیراعلیٰ پنجاب سردار عثمان بزدار نے میر ظفر اللہ خان جمالی کے انتقال پر گہرے دکھ اور افسوس کا اظہار کرتے ہوئے سوگوار خاندان سے دلی ہمدردی اور اظہار تعزیت کیا ہے۔ ان کا کہنا تھا کہ مرحوم شرافت کا پیکر، وضع دار اور اصول پسند سیاست دان تھے۔ ان کی سیاسی اور سماجی خدمات کو ہمیشہ یاد رکھا جائے گا۔ ان کے انتقال پر دلی صدمہ ہوا ہے۔ اللہ تعالیٰ مرحوم کی روح کو جوار رحمت میں جگہ عطا فرمائے۔
سپیکر قومی اسمبلی اسد قیصر نے بھی سابق وزیراعظم میر ظفر اللہ جمالی کے انتقال پر اظہار تعزیت کرتے ہوئے کہا کہ ان کے انتقال کی خبر سن کر دل بہت رنجیدہ ہے۔ وہ ایک بہترین سیاستدان اور اچھی شخصیت کے حامل تھے۔ ان کے لواحقین اور پسماندگان کیساتھ دلی اظہار تعزیت کرتا ہوں۔
یاد رہے کہ مرحوم پچھلے کئی دن سے سخت بیمار تھے اوردو دن پہلے تو ان کی وفات کی خبریں بھی چل گئیں تھیں ، آج عشا کے بعد طبعیت اچانک خراب ہونے پروہ اپنے خالق حقیقی سے جاملے ، ان کی وفات کی تصدیق ان کے بیٹے نے کی
