42 ممالک نے جی 20 کے سامنے ہاتھ جوڑلیے ، قرضوں میں گنجائش پیدا کرنے کی اپیل
باغی ٹی وی :کرونا کی وجہ سے کئی بڑے بڑے ملک مشکلات کا شکار ہوگئے ، سعودی عرب کے وزیر خزانہ محمد الجدعان نے کہا کہ 42 ممالک نے قرض کی ادائیگیوں کو منجمد کرنے کے لیے ‘جی 20’ سے اقدامات کرنے کو کہا ہے۔
غریب ممالک کے قرضوں سے نجات کے لیے بڑھتے ہوئے مطالبات کے درمیان ، جی 20 کے وزرائے خزانہ اور مرکزی بینکوں نے کرونا وائرس سے پیدا ہونے والی کساد بازاری میں عالمی معیشت کو متحرک کرنے کی کوشش تیز کرنے کی ضرورت پر زور دیا۔
سعودی عرب کی میزبانی میں ہونے والی ورچوئل کانفرنس ایسے وقت میں سامنے آئی ہے جب کرونا وبا عالمی معیشت کو نقصان پہنچا رہی ہے ، جبکہ ماہرین غربت سے متاثرہ ترقی پزیر ممالک میں قرضوں کے بحران کی وارننگ دے رہے ہیں۔
سعودی وزیر خزانہ محمد الجد عان اور مرکزی بینک کے گورنر احمد الخلیفی کی زیرصدارت یہ مذاکرہ دو روزہ سربراہ اجلاس کے آغاز کے روز کے بعد ہو رہے ہیں۔ اس اجلاس میں یورپی یونین کے ممالک پانچ ماہ کے بعد پہلی بار کسی عالمی فورم پر عالمی کساد بازاری کی روک تھام کے لیے غور کرنے جا رہے ہیں۔۔
سعودی عرب کے وزیر خزانہ الجدعان نے وضاحت کی کہ کرونا وبائی بیماری نے دنیا کے تمام حصوں میں روزمرہ کی زندگی پر گہرے منفی اثرات مرتب کیے ہیں۔ اس کا براہ راست اثر صحت ، معیشت ، ملازمتوں اور رسد کے تسلسل پر پڑا ہے ، جبکہ معاشی ، معاشرتی اور ماحولیاتی نظام کی تشکیل نو کے لیے ایک قابل قدر موقع پیدا ہوا ہے تاکہ زندگی کے معیار کو بہتر بنانے پر توجہ دی جا سکے۔
