منشیات کے کئی اڈے چلانے والے گینگز نے 2 بھائیوں کوگولیوں سے بھون ڈالا، دونوں موقع پر جاں بحق

باغی ٹی وی:شیخوپورہ (محمد طلال سے) جی ٹی روڈ کی آبادی رحمانیہ غوثیہ کالونی مریدکے میں دیرینہ دشمنی کی بناء پر منشیات کے کئی اڈے چلانے والے گروہ نے دن دیہاڑے فائرنگ کر کے بٹ گروپ کے مقتول سربراہ نواز بلا بٹ کے 2 بیٹوں 35 سالہ عمران نواز اور 40 سالہ شہزاد نواز کو گولیوں سے بھون ڈالا اور ان کے مرنے کی تسلی ہو جانے کے بعد وہاں سے فائرنگ کرتے ہوئے پولیس کے گشت کے فقدان کا فائدہ اٹھاتے ہوئے فرار ہوگئے دو بھائیوں کے قتل کی اطلاع پا کر ایس پی انویسٹی گیشن عثمان منیر سیفی پولیس کی بھاری نفری کے ہمراہ جائے وقوعہ پر پہنچ گئے اور دونوں مقتولین بھائیوں کی لاشوں کو پوسٹ مارٹم کی خاطر سول ہسپتال مریدکے منتقل کروایا بتایا گیا ہے کہ مریدکے میں 2 گروپ روزانہ لاکھوں روپے کی منشیات کی خرید و فروخت کا کاروبار کئی برس سے کر رہے ہیں جس کی وجہ سے گذشتہ 10 برس سے اس علاقہ میں بٹ گروپ اور قصاب گروپ کی دشمنی چل رہی ہے جس کی بھینٹ اب تک 12 افراد چڑھ چکے ہیں پچھلے سال بٹ گروپ کا سربراہ محمد نواز المعروف بٹ کو قتل کر دیا تھا جس کے مقدمہ کا ابھی فیصلہ نہ ہوا ہے وقوعہ کے وقت دونوں بھائی تھانہ سٹی مریدکے سے چند فرلانگ کے فاصلے پر کھیتوں میں اپنے مویشیوں کی حفاظت کے لیے بیٹھے ہوئے تھے جہاں موٹر سائیکلوں پر آنے والے قصاب گروپ کے متعدد مسلح افراد نے دونوں بھائیوں کو چاروں طرف سے گھیر کر ان پر فائرنگ کر دی پولیس کے ذرائع کے مطابق ملزمان کی گرفتاری کے لیے ان کے ممکنہ ٹھکانوں پر چھاپے مارے جا رہے ہیں۔