بھارتی اداکار انوشکا شرما کے مداح ایک عجیب سی کشمکش میں مبتلا ہیں کیونکہ دنیا کے معروف ترین انٹرنیٹ سرچ انجن گوگل نے بھارتی کرکٹر ویرات کوہلی کی اہلیہ اور اداکارہ انوشکا شرما کو 22 سالہ افغان کرکٹر راشد خان کی اہلیہ بنادیا۔
باغی ٹی وی : بھارتی ویب سائٹ ہندوستان ٹائمز کی رپورٹ کے مطابق یقینا ، یہ ایک بہت بڑی الجھن ہے جس کی ابتدا گوگل سرچ بار میں ہوئی ہے۔ جب کوئی گوگل میں ‘راشد خان کی اہلیہ’ کے لئےسرچ کرتا ہے تو الگورتھم کی خرابی کے باعث گوگل پر اس کا نتیجہ انوشکا شرما کے طور پر ظاہر ہوتا ہے۔ الجھاؤ جیسا بھی ہے اس سب کے پیچھے بھی ایک وجہ ہے۔
جب کوئی راشد خان اور ان کی اہلیہ کو گوگل پر سرچ کرے تو گوگل ان کا نام اور پھر راشد خان کی کامیابیوں اور ان ٹیموں کا تعارف دیتا ہے جبکہ اہلیہ کے خانے میں انوشکا شرما کا نام آتا ہے۔
بھارتی میڈیا رپورٹس میں گوگل کی اتنی بنیادی غلطی کی وجہ راشد خان کی 2018 میں ہونے والی ایک بات چیت قرار دیا جارہا ہے راشد خان نے اپنے مداحوں سے انسٹاگرام پر لائیو چیٹ کے دوران شائقین کرکٹ اور پرستاروں کے سوالوں کا جواب دیتے ہوئے بتایا تھا کہ بالی ووڈ میں ان کی پسندیدہ اداکارائیں پریتی زنٹا اور انوشکا شرما ہیں۔
بالی وڈ اداکارہ انوشکا شرما بھارتی کرکٹر ویرات کوہلی کی اہلیہ ہیں، دونوں تین برس قبل رشتہ ازدواج میں منسلک ہوئے۔رواں برس ماہِ اگست میں دونوں نے جلد ہی ننھے مہمان کی آمد کی بھی خوشخبری سنائی تھی۔
جبکہ دوسری جانب افغان کرکٹر نے اب تک شادی نہیں کی،راشد خان کا کہنا ہے کہ وہ افغانستان کو کرکٹ ورلڈکپ جتوا کر ہی شادی کریں گے۔
