گورنر سندھ عمران اسماعیل کا یوم عاشورہ کے موقع پر پیغام

گورنر سندھ عمران اسماعیل نے یوم عاشورہ کے موقع پر پیغام دیتے ہوئے کہا کہ 10 محرم الحرام کسی ایک جماعت ، فرقے یا کسی ایک سو چ رکھنے والوں کا نہیں ہے بلکہ آج کا دن تمام عالم ِ اسلام کو حق و باطل میں تمیز کرنے کا درس دیتا ہے۔ سیدناحسین کی قربانی نے اسلامی تاریخ میں اسلام کی سربلندی اور اعلیٰ ترین مقاصد کے حصول کے لئے جان کی بازی لگا دینے کی روایت قائم کی۔
گورنر سندھ نے کہا کہ سیدناحسین کی قربانی تاریخ کے ہر دور میں صراط مستقیم پر چلنے والوں کے لئے ایک روشن مثال ہے۔
انہوں نے مزید کہا کہ شہید ان کربلا نے اپنے قول و فعل سے حق و صداقت کی راہ میں جانثاری کی عظیم تاریخ رقم کی۔ اور انہوں نے پوری استقامت سے اس حق کے لئے اپنی جان قربان کر دی جو آج بنی نوع انسان کا سب سے بڑا امتیاز ہے، یعنی اپنی رائے رکھنے اور اس پر قائم رہنے کا حق۔ جو سچ ہو اسے قبول کرنے اور اس راستے پر چلتے ہوئے جان کی قربانی دینے کا حوصلہ۔
گورنر سندھ نے کہا کہ جو بھائی، بہنیں، بزرگ، مائیں، بیٹیاں آج کے دن جلوس میں شریک ہوں وہ کورونا سے بچاو¿ کی ایس او پیز کا خیال کریں ۔ سماجی فاصلہ رکھیں، ماسک لگائیں، ہاتھوں میں دستانے پہنیں، سینی ٹائزر سے اپنے ہاتھوں کو صاف رکھیں تاکہ کورونا سے خود اور اپنے گھر والوں کو محفوظ رکھ سکیں۔