حافظ آباد(خبر نگارشمائلہ) ڈی پی او حافظ آباد عاطف نذیر نے 21 رمضان المبارک یوم شہادت حضرت علیؓ کی مناسبت سے نکالے جانے والے مرکزی جلوس کے لیے فول پروف سیکیورٹی انتظامات کا جائزہ لیا۔ انہوں نے ڈی ایس پی صدر سرکل اور ایس ایچ او سٹی حافظ آباد کو فول پروف سیکیورٹی یقینی بنانے کی ہدایات دیں۔
مرکزی جلوس کا آغاز مسعود علی شاہ المعروف چن شاہ کی رہائش گاہ نزد تارڑ ٹریولز سے ہوگا اور اپنے مقررہ راستوں بشمول ریلوے پھاٹک اور فوارہ چوک سے گزرتا ہوا مرکزی امام بارگاہ میں اختتام پذیر ہوگا۔ جلوس کے دوران سیکیورٹی کے غیرمعمولی اقدامات کیے گئے ہیں جن میں واک تھرو گیٹس، سی سی ٹی وی کیمرے اور پولیس کی بھاری نفری کی تعیناتی شامل ہے۔ داخلی و خارجی راستوں پر کڑی نگرانی رکھی جائے گی تاکہ کسی بھی ناخوشگوار واقعے سے بچا جا سکے۔
ڈی پی او حافظ آباد نے ڈی ایس پی ٹریفک کو ہدایت دی کہ ٹریفک کی روانی برقرار رکھنے کے لیے متبادل راستوں کا انتظام کیا جائے تاکہ شہریوں کو کسی قسم کی دشواری کا سامنا نہ ہو۔
