ہالی وڈ اسٹوڈیو وارنر برادرز نے فلم بینوں کی بڑی مشکل آسان کر دی

کورونا وائرس کے باعث دنیا کے کئی ممالک میں سنیما اور تھیٹرز بند ہیں جس کی وجہ سے فلم دیکھنے کے شوقین افراد کی مشکلات کو دیکھتے ہوئے فلموں کو ایک ہی وقت پر تھیٹر اور ایچ بی او میکس پر نشر کرنے کا فیصلہ کیا ہے-

باغی ٹی وی :غیر ملکی میڈیا رپورٹس کے مطابق دنیا بھر میں کورونا پابندیوں کی وجہ سے پریشان فلمی شائقین کو اب 2021 میں بڑی فلمیں دیکھنے کیلئے سنیما جانے کی ضرورت نہیں۔ کیونکہ ہالی وڈ کے معروف فلم اسٹوڈیو وارنر برادرز پکچرز نے اعلان کیا ہے کہ 2021 میں ریلیز ہونے والی ان کی تمام فلمیں ایک ہی وقت پر تھیٹر اور ایچ بی او میکس پر نشر کی جائیں گی۔

دنیا کے بیشتر ممالک میں لوگوں کی بڑی تعداد کو نیٹ فلکس، ایمازون اور ایچ بی او میکس جیسے آن لائن اسٹریمنگ چینلز پر منتقل ہونے کی صورتحال کو دیکھتے ہوئے وارنر برادرز پکچرز کی جانب سے بھی اپنی تمام فلمیں ایچ بی او میکس پر جاری کرنے کا فیصلہ سامنے آئے ہے-

وارنر برادرز کی جانب سے یہ فیصلہ رواں سال ریلیز ہونے والی سائنس فکشن فلم ٹینٹ کے ٹکٹس کی فروخت میں کمی کو دیکھتے ہوئے کیا گیا ہے۔

واضح رہے کہ وارنر برادرز پکچرز سال 2021 میں چند بڑی فلمیں ریلیز کرے گا جن میں نئی میٹرکس، گاڈزلا ورسز کونگ، ان دا ہائیٹس جیسی بڑی فلمیں بھی شامل ہوں گی۔