حوثی باغیوں کا اتحادی افواج کے ہیڈ کوارٹر پر بیلسٹک میزائل حملہ

صنعا : حوثی باغیوں نے سعودی عرب میں اتحادی فوجیوں کے ہیڈ کوارٹر پر بیلسٹک میزائل سے ٹارگٹ کرنے کا دعویٰ کیا ہے ۔حوثیوں کے فوجی ترجمان یحییٰ سیری نے المسیرہ ٹیلی ویژن چینل کے لئے جاری کردہ بیان میں کہا ہے کہ ملک کی جنوبی تحصیل نجران میں سعودی زیر قیادت اتحادی افواج کے ہیڈ کوارٹر کو مختصر مسافت کے بیلسٹک میزائل سے نشانہ بنایا گیا ہے۔

ذرائع کے مطابق اس حملے میں کمانڈروں سمیت کثیر تعداد میں افراد ہلاک اور زخمی ہو گئے ہیں۔انہوں نے کہا ہے کہ ہدف بنایا گیا ہیڈ کوارٹر سعودی عرب ۔ یمن سرحد پر جھڑپوں کے کمانڈ مرکز کے طور پر استعمال کیا جا رہا تھا۔

واضح رہے کہ حالیہ دنوں میں حوثی سعودی ائیر ڈیفنس سسٹم کی طرف سے ناکار بنائے جانے والے درمیانی اور مختصر مسافت کے بیلسٹک میزائلوں کے ساتھ ساتھ ڈرون طیاروں کے ساتھ بھی سعودی عرب کے بعض علاقوں کو نشانہ بنا رہے ہیں۔