گوجرانوالہ (باغی ٹی وی، نامہ نگار محمد رمضان نوشاہی) ایف آئی اے نے انسانی اسمگلنگ میں ملوث انتہائی مطلوب اشتہاریوں کے خلاف فیصلہ کن کارروائی کرتے ہوئے یونان کشتی حادثے کے مرکزی کردار سعید سنیارہ کو گرفتار کر لیا ہے۔ ایف آئی اے حکام کے مطابق گرفتار ملزم سعید سنیارہ ریڈ بک میں شامل انسانی اسمگلرز کی فہرست میں شامل انتہائی مطلوب ملزم تھا، جس کے خلاف شہریوں کو غیر قانونی طور پر لیبیا کے راستے اٹلی بھجوانے کے 12 مقدمات درج ہیں۔
حکام نے بتایا کہ ملزم کی گرفتاری یونان کشتی حادثے کی تحقیقات میں ایک اہم پیش رفت ہے۔ یاد رہے کہ جون 2023ء میں پیش آنے والے لیبیا کشتی حادثے میں 296 پاکستانیوں سمیت درجنوں افراد جاں بحق ہو گئے تھے، جس کے بعد انسانی اسمگلنگ کے اس خطرناک نیٹ ورک کے خلاف تحقیقات تیز کر دی گئی تھیں۔ ایف آئی اے کا کہنا ہے کہ سعید سنیارہ کو مزید تفتیش کے لیے متعلقہ تفتیشی ٹیم کے حوالے کر دیا گیا ہے اور اس کے بین الاقوامی روابط اور نیٹ ورک کے بارے میں اہم انکشافات متوقع ہیں۔
