آئی سی سی اجلاس: چیمپئنز ٹرافی 2025 کی تیاریوں پر اطمینان، پاکستان دورے کی دعوت

دبئی میں انٹرنیشنل کرکٹ کونسل (آئی سی سی) کا تین روزہ اجلاس اختتام پذیر ہوا، جس میں پاکستان کرکٹ بورڈ (پی سی بی) کے چیئرمین محسن نقوی نے شرکت کی۔ اجلاس میں چیمپئنز ٹرافی 2025 کے انتظامات اور تیاریوں پر تفصیلی گفتگو ہوئی، جس کے بعد آئی سی سی بورڈ نے ان تیاریوں پر اطمینان کا اظہار کیا۔ذرائع کے مطابق، پی سی بی چیئرمین محسن نقوی نے اجلاس میں چیمپئنز ٹرافی 2025 کے حوالے سے اہم بریفنگ دی اور آئی سی سی بورڈ ممبران کو تیاریوں کی تفصیلات سے آگاہ کیا۔ اس موقع پر چیئرمین پی سی بی نے آئی سی سی حکام کو پاکستان آنے کی دعوت بھی دی تاکہ وہ خود اسٹیڈیمز اور دیگر انتظامات کا جائزہ لے سکیں۔اجلاس میں بتایا گیا کہ پاکستان میں چیمپئنز ٹرافی کے لیے اسٹیڈیمز کی اپ گریڈیشن سمیت تمام تیاریوں پر تیزی سے کام جاری ہے اور یہ تمام کام مقررہ وقت پر مکمل کرلیے جائیں گے۔ چیئرمین محسن نقوی نے اس بات کی بھی یقین دہانی کروائی کہ پاکستان اس بڑے ایونٹ کے لیے بہترین انتظامات کرے گا۔
چیمپئنز ٹرافی 2025 کی تیاریوں پر آئی سی سی بورڈ کی جانب سے پیش کی گئی رپورٹ پر بھی اطمینان کا اظہار کیا گیا۔ رپورٹ میں بتایا گیا کہ پاکستان میں اسٹیڈیمز کی بحالی، سکیورٹی انتظامات، اور دیگر ضروری اقدامات تیزی سے جاری ہیں اور ٹورنامنٹ کو کامیاب بنانے کے لیے تمام وسائل بروئے کار لائے جا رہے ہیں۔ چیمپئنز ٹرافی ٹورنامنٹ 2025 کے فروری اور مارچ میں پاکستان میں ہونے کا شیڈول ہے، جس کے لیے پی سی بی بھرپور تیاری کر رہا ہے۔تین روزہ اجلاس کے دوران دیگر اہم امور پر بھی بات چیت ہوئی۔ اجلاس میں آئی سی سی چیئر اور انڈیپنڈنٹ ڈائریکٹر کی میعاد کو تین سال تک بڑھانے کی سفارش کی گئی، جب کہ آئی سی سی مینز کرکٹ کمیٹی میں اسکاٹ ویننک کو فل ممبر کا نمائندہ اور اسکاٹ ایڈورڈز کو ایسوسی ایٹ ممبر کا نمائندہ مقرر کیا گیا۔اجلاس میں آئی سی سی کے اعلیٰ عہدیداروں نے پی سی بی کی تیاریوں کی ستائش کی اور اس عزم کا اظہار کیا کہ چیمپئنز ٹرافی 2025 پاکستان میں ایک شاندار کرکٹ ایونٹ ثابت ہوگا۔