برآمدات کی کمی اور اضافے بارے ادارہ شماریات نے رپورٹ جاری کردی
باغی ٹی وی : برآمدات کی کس مد میں بہتری ہوئی اور کہاں کمی آئی ادارہ شماریات نے رپورٹ جاری کر دی. مئی 2020ء کے دوران سیمنٹ کی برآمدات میں 13.22فیصد اضافہ ہوا جبکہ جاری مالی سال کے دوران برآمدات میں 6.79 فیصد کمی ریکارڈ کی گئی ہے۔
ادارہ برائے شماریات پاکستان (پی بی ایس) کی رپورٹ کے مطابق مئی 2020ء کے دوران سیمنٹ کی برآمدات 19.303 ملین ڈالر تک بڑھ گئیں جبکہ مئی 2019ء میں سیمنٹ کی برآمد سے 17.049 ملین ڈالرز زرمبادلہ کمایا گیا تھا۔
اس طرح مئی 2019ء کے مقابلہ میں مئی 2020ء کے دوران برآمدات میں 2.254 ملین ڈالر یعنی 13 فیصد سے زائد کا اضافہ ریکارڈ کیا گیا ہے۔ پی بی ایس کے مطابق گزشتہ مالی سال کے مقابلہ میں رواں مالی سال کے پہلے گیارہ ماہ میں سیمنٹ کی برآمدات242.507 ملین ڈالر تک کم ہو گئیں جبکہ گزشتہ مالی سال کے اسی عرصہ کے دوران سیمنٹ کی برآمدات کا حجم 260.170 ملین ڈالر رہا تھا۔
اس طرح گزشتہ مالی سال کے مقابلہ میں رواں مالی سال میں سیمنٹ کی مجموعی ملکی برآمدات میں 17.663 ملین ڈالر یعنی 6.79 فیصد کی کمی واقع ہوئی ہے۔
پی بی ایس کے مطابق بالحاظ وزن جاری مالی سال کے دوران سیمنٹ کی برآمدات جولائی تا مئی 2019-20ء کے دوران 6.94 فیصد کے اضافہ سے 65 لاکھ 62 ہزار 179 میٹرک ٹن تک بڑھ گئیں جبکہ گزشتہ مالی سال میں جولائی تا مئی 2018-19ء کے دوران سیمنٹ کی برآمدات61 لاکھ 36 ہزار 274 میٹرک ٹن رہی تھیں۔
