190 ملین پاؤنڈ کیس،احتساب عدالت کے جج اور نیب ٹیم اڈیالہ جیل پہنچ گئی

اسلام آباد: احتساب عدالت میں سابق وزیراعظم عمران خان کے خلاف 190 ملین پاؤنڈ اسکینڈل کیس کی سماعت آج ہوگی۔

باغی ٹی وی : احتساب عدالت کے جج محمد بشیر سماعت کے لئے اڈیالہ جیل پہنچ گئے ہیں، اس موقع پر چیئرمین پی ٹی آئی کو جسمانی ریمانڈ مکمل ہونے پرآج عدالت پیش کیا جائے گا،نیب پراسیکیوٹرسردارمظفرکی سربراہی میں 5 رکنی ٹیم بھی اڈیالہ جیل پہنچ گئی، نیب ٹیم میں ڈپٹی ڈائریکٹر میاں عمر، عبدالستار،عرفان اور تنویر شامل ہیں۔

نیب ٹیم احتساب عدالت کو 23 سے 26 نومبر تک عمران خان کی گئی تفتیش کے حوالے سے آگاہ کرے گی ،واضح رہے کہ گزشتہ روز 190ملین پاونڈزاسکینڈل میں چیئرمین پی ٹی آئی سے تفتیش کے لئے نیب ٹیمیں اڈیالہ جیل پہنچی تھیں۔

اسسٹنٹ ڈائریکٹر نیب نے عمران خان سے ڈھائی گھنٹے تفتیش کی، ان کے پاس مختلف دستاویزات موجود تھے۔ اس کے بعد نیب ٹیم کے مزید 2 ممبران نے اڈیالہ جیل پہنچ کر دوسرے مرحلے میں تفتیش کی،نیب کی ٹیموں نے دس گھنٹے تک عمران خان سے جیل میں تفتیش کی تھی،قومی احتساب بیوروکی ٹیم پی ٹی آئی چیئرمین سے پندرہ نومبرسے مسلسل تفتیش کررہی ہے،جبکہ نیب 190 ملین پاؤ نڈز کیس میں عمران خان نے ضمانت کے لئے ہائی کورٹ کے فیصلہ کے خلاف سپریم کورٹ میں اپیل دائر کر رکھی ہے۔

190 ملین پاؤنڈ کیس میں پیشی، بشریٰ بی بی کے خلاف نعرے بازی