کراچی: وزیر خارجہ بلاول بھٹو زرداری نے چیئرمین پی ٹی آئی عمران خان کی گرفتاری پرتبصرہ کرتے ہوئے اسے مکافات عمل قرار دیا ہے-
باغی ٹی وی : چیئرمین تحریک انصاف عمران خان کی گرفتاری پر وزیر خارجہ بلاول بھٹو زرداری نے اسے مکافات عمل قرار دیا دوسری جانب وفاقی وزیر اطلاعات مریم اورنگزیب نے کہا کہ ایک چور کی گرفتاری پر سیاسی انتقام کا بیانیہ بنانے کی کوشش کی جارہی ہے، وہ چور پکڑا گیا ہے جو 15 ماہ سے بھاگ رہا تھا۔
پریس کانفرنس میں مریم اورنگزیب نے سوال اٹھایا کہ الیکشن میں تین ماہ رہ جائیں تو کیا چوروں کو گرفتار کرنا بند کردیا جاتا ہے؟چیئرمین پی ٹی آئی کےخلاف تحقیقات ایک سال سے جاری تھیں،پی ٹی آئی چیئرمین کی گرفتاری سیاسی نہیں ہےقانونی تقاضےپورے ہونے پر عدالت نے فیصلہ سنایا، ٹرائل کورٹ نے تفصیلی فیصلہ جاری کیاہے۔
واضح رہے کہ اسلام آباد کی مقامی عدالت نے عمران خان کو توشہ خانہ فوجداری کیس میں 5 برس کے لئے نا اہل اور 3 سال قید کی سزا سنائی ہے عدالت نے ایک لاکھ جرمانہ بھی کر دیاعدالت نے فیصلےمیں کہا کہ ملزم نے جان بوجھ کرالیکشن کمیشن میں جھوٹی تفصیلات دیں، ملزم کو الیکشن ایکٹ کی سیکشن 174 کے تحت 3 سال قید کی سزا سنائی جاتی ہے-
عدالتی فیصلے کے بعد چیئرمین تحریک انصاف کو ان کی لاہور میں رہائشگاہ زمان پارک سے گرفتار کیا گیا جس کے خلاف احتجاج کرنے پر تین کارکنان کو بھی حراست میں لیا جا چکا ہے عمران خان کی گرفتاری اور نا اہلی کے فیصلے پر ن لیگ کے کارکنان نے سڑکوں اور اور پارٹی دفاتر میں مٹھائیاں تقسیم کرنا شروع کردیں ن لیگ کے علاوہ پشاور میں بھی عوامی نیشنل پارٹی (اے این پی) کے ورکرز نے جگہ جگہ مٹھائیاں بانٹی، جس کی ویڈیوز سوشل میڈیا پر وائرل ہو رہی ہیں۔
