عالمی مالیاتی ادارے آئی ایم ایف کے ایگزیکٹو بورڈ نے پاکستان کے لیے توسیعی فنڈ سہولت (EFF) کے تحت ایک ارب ڈالر کی اگلی قسط جاری کرنے کی باضابطہ منظوری دے دی ہے۔ یہ پیشرفت ایسے وقت میں سامنے آئی ہے جب بھارت کی جانب سے پاکستان کے قرض پروگرام پر اثر انداز ہونے کی بھرپور کوششیں جاری تھیں، تاہم ان تمام سفارتی چالوں کو ناکامی کا سامنا کرنا پڑا۔
ذرائع کے مطابق آئی ایم ایف بورڈ اجلاس میں پاکستان کی معاشی کارکردگی، اصلاحاتی اقدامات اور مالیاتی نظم و ضبط کا جائزہ لیا گیا، جس کے بعد قسط کی منظوری دی گئی۔ پاکستان نے اپنے وعدوں کے مطابق مختلف معاشی اصلاحات کیں جن میں ٹیکس اصلاحات، توانائی شعبے کی بہتری اور مالی خسارے پر قابو پانے جیسے اقدامات شامل ہیں۔
یہ قسط پاکستان کے زرمبادلہ کے ذخائر کو سہارا دینے اور معاشی استحکام برقرار رکھنے میں اہم کردار ادا کرے گی۔ ماہرین کے مطابق اس منظوری سے نہ صرف عالمی مالیاتی اداروں کا پاکستان پر اعتماد بحال ہوا ہے بلکہ یہ فیصلہ بین الاقوامی سرمایہ کاروں کے اعتماد میں اضافے کا باعث بھی بنے گا۔
