وزیراعظم سے وزیر قانون پنجاب راجہ بشارت کی اہم ملاقات ،زیربحث آئے اہم معاملات

اسلام آباد:وزیراعظم سے وزیر قانون پنجاب راجہ بشارت کی اہم ملاقات،زیربحث آئے اہم معاملات،اطلاعات کے مطابق وزیراعظم عمران خان نے کہا ہے کہ وفاقی حکومت گڈگورننس کے لیے پنجاب حکومت سے تعاون جاری رکھےگی۔

تفصیلات کے مطابق وزیراعظم عمران خان سے بنی گالہ میں وزیر قانون پنجاب راجہ بشارت نے ملاقات کی۔وزیراعظم نے پنجاب حکومت اور وزارت قانون کی کارکردگی کو بھی سراہا۔وزیر قانون پنجاب راجہ بشارت نے وزیراعظم کو وزارت کی کارکردگی پر بریفنگ دی۔

اس موقع پر وزیراعظم عمران خان کا کہنا تھا کہ پنجاب کا نیا بلدیاتی قانون منظور ہونے سے حقیقی تبدیلی کا خواب پورا ہوگا،وفاقی حکومت گڈگورننس کے لیے پنجاب حکومت سے تعاون جاری رکھےگی۔

وزیراعظم کا کہنا تھا کہ تمام محکمے،ادارے پی ٹی آئی ویژن کے مطابق عوام کی خدمت جاری رکھیں۔

دوسری جانب راجہ بشارت نے کہا کہ پنجاب حکومت مفاد عامہ کی قانون سازی پر بھرپورتوجہ دے رہی ہے،آپ کی قیادت میں ملک کرونا کے خلاف جنگ جیت رہا ہے۔

صوبائی وزیر قانون کا کہنا تھا کہ کرونا کے خلاف جنگ کو بھی پنجاب میں قانونی تحفظ فراہم کیاگیا ہے،حکومت وزیراعلیٰ کی قیادت میں کرپشن پرقابو پا کر ترقی ممکن بنا رہی ہے۔

اس سے قبل وزیراعظم عمران خان کی زیر صدارت معاشی تھنک ٹینک کا اہم اجلاس ہوا جس میں مشیرخزانہ،گورنر اسٹیٹ بینک، سابق فنانس سیکریٹری، رزاق داؤد،سلطان علانہ،عارف حبیب اور اعجاز نبی نے شرکت کی۔

وزیراعظم عمران خان کا کہنا تھا کہ اسمال اینڈ میڈیم انڈسٹری کے فروغ کی ضرورت پر زور دیا ہے۔