اسلام آباد:عمران خان نے 70 لاکھ سے زائد اوورسیز پاکستانیوں کا دل جیت لیا ،اطلاعات کے مطابق وزیراعظم پاکستان نے وعدے کے مطابق اوورسیز پاکستانیوں کے ایک اورمطالبے کوپوراکرکے 70 لاکھ سے زائد پاکستانیوںکے دل جیت لیئے ہیں
ذرائع کے مطابق وزیر اعظم نے بیرون ملک مقیم پاکستانیوں سے کیا وعدہ پورا کر دیا، اوورسیز پاکستانیوں کے الیکشن لڑنے کے سلسلے میں وزیراعظم اور وفاقی کابینہ نے آئینی ترمیم پارلیمنٹ میں پیش کرنے کی منظوری دے دی۔
اس سلسلے میں وزیر اعظم کے مشیر پارلیمانی امور ڈاکٹر بابر اعوان کا کہنا ہے کہ تمام سیاسی جماعتوں نے تارکین وطن کو ووٹ کا حق دینے کا وعدہ کیا لیکن یہ معاملہ وعدوں سے آگے تکمیل تک نہیں پہنچایا جا سکا تھا۔
بابر اعوان نے کہا کہ عمران خان نے اوورسیز پاکستانیوں سے کیا وعدہ پورا کر دیا، اس سلسلے میں آئینی ترمیم کی منظوری کے لیے معاملہ پارلیمنٹ میں لے کر جائیں گے، اس نئی ترمیم کے تحت دہری شہریت کا حامل شخص الیکشن لڑنے کا اہل ہوگا۔
مشیر پارلیمانی امور کا کہنا تھا کہ الیکشن ہارنے کی صورت میں دہری شہریت چھوڑنے کی ضرورت نہیں ہوگی تاہم الیکشن جیتنے کی صورت میں عہدے کا حلف اٹھانے سے قبل شہریت چھوڑنا ہوگی۔
خیال رہے کہ آج اوورسیز پاکستانی فاؤنڈیشن میں ایک پاسپورٹ آفس بھی قائم کر دیا گیا ہے، جس کے تحت اوورسیز پاکستانی اب نادرا سروسز کے علاوہ پاسپورٹ سروس بھی حاصل کر سکیں گے، اس سے ان کے خاندان کے افراد بھی مستفید ہو سکیں گے۔
