ٹوکیو: 70ہزار سے زائد جاپانی 100 سال کی عمر کو پارکرگئے ۔اس ایشیائی ملک میں شرح پیدائش انتہائی کم ہے جبکہ گزشتہ 49 سال کے دوران یہاں بڑی عمر کے افراد میں مسلسل اضافہ ریکارڈ کیا گیا ہے۔ماہرین کے مطابق اگر یہی سلسلہ رہا تو یہ تعداد مزید بڑھ سکتی ہے،
جاپان میں عمروں کا تعین کرنے والے ادارے کے مطابق اس وقت جاپان میں عمر کی سنچری مکمل کرنے میں خواتین مردوں سے کہیں آگے ہیں۔ کُل 71238 افراد میں سے 88.1 فیصد خواتین اپنی زندگی کی 100 یا اس سے زائد بہاریں دیکھ چکی ہیں۔
وزارت صحت کی جانب سے جاری کیے گئے اعداد و شمار کے مطابق سو سالہ افراد کی تعداد 1989 کے مقابلے میں 23 گنا بڑھ چکی ہے۔جاپان میں 100 سال سے زیادہ عمر کی خواتین کی کل تعداد اس اتوار کو 62775 ہو جائے گی جو کہ گزشتہ سال کے مقابلے میں 1321 افراد زیادہ ہے۔
دوسری طرف 100 سال سے زائد عمر کی ایک خاتون کے بارے میں بھی یہ رپورٹ ائی ہےکہ جاپان کے شہر فوکواوکا کی رہائشی کین تاناکا جو کہ 116 سال کی عمر رکھتی ہیں جاپان کی معمر ترین خاتون ہیں۔ کین تاناکا گینز بُک آف ورلڈ ریکارڈ کے مطابق دنیا کی معمر ترین زندہ شخصیت ہیں۔چیٹیٹسُو واٹانابی جاپان کے معمر ترین زندہ مرد ہیں، ان کی عمر 112 سال ہے۔
