اسلام آباد: بھارتی ہائی کمشنر کو پاکستان سے نکلنا پڑا ، پاکستان کی جانب سے ملک چھوڑنے کے حکم کے بعد بھارتی ہائی کمشنر اجے بساریہ براستہ ابوظہبی بھارت کیلئے روانہ ہوگئے۔
ذرائع کے مطابق بھارتی ہائی کمشنر اجے بساریہ نے پاکستان چھوڑ دیا ہے اور وہ اسلام آباد سے متحدہ عرب امارات کے شہر ابوظہبی کیلئے روانہ ہوگئے ہیں جہاں سے وہ بھارت پہنچیں گے۔بھارتی ہائی کمشنر کو ابو ظہبی اس لیے جانا پڑا کیونکہ پاکستان نے بھارت سے فضائی رابطے منقطع کردیئے ہیں اور اب براہ راست پاکستان سے بھارت کوئی پرواز نہیں جاسکتی
مقبوضہ کشمیر کی خصوصی حیثیت ختم کرنے کے بھارتی اقدام کے بعد پاکستان نے بھارت سے تجارت معطل اور سفارتی تعلقات محدود کرنے کا فیصلہ کیا تھا۔قومی سلامتی کمیٹی کے اجلاس میں فیصلے کے بعد پاکستان نے باضابطہ طور پر بھارتی ہائی کمشنر اجے بساریہ کو ملک چھوڑنے کا حکم دیا تھا۔
