ایف آئی اے کمپوزٹ سرکل فیصل آباد نے انسانی سمگلنگ میں ملوث ایک بین الاقوامی گینگ کو بے نقاب کرنے میں بڑی کامیابی حاصل کی ہے۔
ڈائریکٹر جنرل ایف آئی اے احمد اسحاق جہانگیر کی ہدایت پر ایف آئی اے نے انسانی سمگلروں کے خلاف ایک خصوصی کریک ڈاؤن شروع کیا، جس کے نتیجے میں ایک اہم ملزم کو گرفتار کیا گیا۔ملزم کی شناخت محمد اشفاق کے نام سے ہوئی، جسے فیصل آباد کے علاقے کھڑیانوالہ سے گرفتار کیا گیا۔ ایف آئی اے نے چھاپہ مار کارروائی کے دوران ملزم سے ایرانی کرنسی بھی برآمد کی۔ ملزم انسانی سمگلنگ میں ملوث بین الاقوامی گینگ کا اہم رکن تھا، جو شہریوں سے بھاری رقوم لے کر انہیں ترکی کے راستے یورپ بھجواتا تھا۔ملزم محمد اشفاق اور اس کے دیگر ساتھی سادہ لوح شہریوں کو ملازمت کے جھانسے دے کر وزٹ ویزے پر آذربائیجان، ترکی اور دیگر ممالک بھجواتے تھے۔ بعدازاں، یہ شہری ترکی سے سمندر کے راستے یورپ پہنچائے جاتے تھے۔ ایف آئی اے کے مطابق، ملزم کا نیٹ ورک ترکی اور دیگر یورپی ممالک میں فعال تھا، جہاں اس کے دیگر ساتھی اس غیر قانونی کاروبار کو چلانے میں ملوث تھے۔ملزم کے موبائل فون سے اہم شواہد بھی حاصل کر لئے گئے ہیں، جن سے اس کے بین الاقوامی ایجنٹس سے روابط کا پتا چلتا ہے۔ ملزم شہریوں سے لاکھوں روپے وصول کرتا تھا اور ان کی بیرون ملک منتقلی میں ناکامی کے بعد وہ روپوش ہو جاتا تھا۔ ایف آئی اے نے ملزم کو گرفتار کر کے تفتیش کا آغاز کر دیا ہے، اور دیگر ملزمان اور سہولت کاروں کی گرفتاری کے لئے چھاپے مارنے کی کارروائیاں جاری ہیں۔
ایف آئی اے کے حکام نے کہا ہے کہ انسانی سمگلنگ میں ملوث عناصر کے خلاف بلا امتیاز کارروائیاں جاری رکھی جائیں گی۔ ایف آئی اے کے مطابق، شہریوں کی زندگیوں سے کھیلنے والے ان ملزمان کو کسی صورت معاف نہیں کیا جائے گا۔ ڈائریکٹر گجرانوالہ زون عبدالقادر قمر نے کہا کہ "سادہ لوح شہریوں کی زندگیوں سے کھیلنے والے کسی معافی کے مستحق نہیں۔” انہوں نے مزید کہا کہ "انسانی سمگلنگ میں ملوث تمام عناصر کو کیفر کردار تک پہنچایا جائے گا۔”
ایف آئی اے گوجرانوالہ زون نے بھی انسانی سمگلنگ میں ملوث ایک ایجنٹ کو گرفتار کرنے میں کامیابی حاصل کی ہے۔ گرفتار ملزم کی شناخت جاوید اشرف کے نام سے ہوئی، جسے ایمن آباد گجرانوالہ سے گرفتار کیا گیا۔ ملزم نے شہریوں کو بیرون ملک ملازمت کے لئے لاکھوں روپے بٹورے تھے، مگر وہ ان افراد کو باہر بھجوانے میں ناکام رہا۔ ملزم جاوید اشرف نے مجموعی طور پر 62 لاکھ 96 ہزار روپے ہتھیائے تھے۔
ایف آئی اے کی جانب سے انسانی سمگلنگ کے خلاف یہ کارروائیاں اس بات کا غماز ہیں کہ ادارہ اس سنگین مسئلے کے حل کے لئے پرعزم ہے اور وہ کسی بھی فرد یا گینگ کو انسانوں کی اسمگلنگ کے کاروبار میں ملوث ہونے کی اجازت نہیں دے گا۔ ایف آئی اے کے حکام نے شہریوں سے اپیل کی ہے کہ وہ اپنے حقوق کے تحفظ کے لئے محتاط رہیں اور غیر قانونی سرگرمیوں کے بارے میں ادارے کو فوری اطلاع دیں۔
پاکستان اور بنگلہ دیش کے درمیان براہِ راست شپنگ روٹ، مثبت نتائج
افغانستان،را کا بدنام زمانہ ایجنٹ حملے میں زخمی،ساتھی ہلاک
